ДДТТ 75-сола мешавад

Душанбе, 7.08.2014. (АМИТ «Ховар», Мавҷуда Анварӣ).-«Донишгоҳи давлатии тиббии Тоҷикистон ба номи Абӯали ибни Сино имсол 75-сола мешавад. Дар давоми 75 соли мавҷудият ин даргоҳ зиёда аз 36 ҳазор мутахассиси соҳибмаълумотро тарбия намудааст. 98 дарсади мутахассисони соҳаи нигоҳдории тандурустӣ дар кишвар хатмкунандагони Донишгоҳи давлатии тиббӣ мебошад»,- гуфт Убайдулло Қурбонов-ректори донишгоҳ зимни нишасти хабарӣ.Донишкада соли аввали фаъолият (1939) аз як факулта ва шаш кафедра иборат буд ва дар он 130 нафар донишҷӯ таҳсил мекарданд. Ба донишкада номи олими бузург, файласуф ва табиб Абӯалӣ ибни Сино гузошта шуд. Соли 1992 донишкада ба Донишгоҳи давлатии тиббии Тоҷикистон ба номи Абӯалӣ ибни Сино табдил ёфт. Баъди мақоми донишгоҳро соҳиб шудан, то соли 1999 дар ҳайати донишгоҳ 67 кафедра бо 627 нафар профессору омӯзгор, ки аз онҳо 66 нафар доктор ва 346 нафар номзадҳои илмҳои тиб буданд, фаъолият менамуданд. Айни ҳол донишгоҳ аз 4 факулта-факултаи тиббӣ, стамотологӣ, фарматсевтӣ ва нигоҳдории тандурустӣ иборат аст. Ҳайати профессорону омӯзгоронаш ба 631 нафар расидааст. Теъдоди омӯзгорони ҳамкор аз 206 нафар иборат аст. Дар маҷмӯъ муҳассилини донишгоҳ 9 ҳазору 347 нафарро ташкил медиҳад.