Ифтитоҳи маркази бачагонаи рассомӣ

Душанбе, 5.08.2014. (АМИТ «Ховар», Мавҷуда Анварӣ). –Ғанизода Ҷамшед-ректори Донишкадаи давлатии санъати тасвирӣ ва дизайн зимни нишасти матбуотӣ зикр намуд, ки донишкада навтаъсис буда, дар заминаи шуъбаи рассомии Донишкадаи давлатии санъати Тоҷикистон ба номи М. Турсунзода таъсис ёфта, фаъолияти худро ба роҳ мондааст.Раванди таълим ва низоми машғулиятҳо бо санадҳои меъёрии ҳуқуқии аз тарафи Вазорати маориф ва илми ҷумҳурӣ муқарраргардида, аз рӯи 21 ихтисос ба роҳ монда шудааст. Роҳбарияти донишкада ният дорад, ки онро то соли 2015 ба 27 ихтисос расонад. Шумораи умумии донишҷӯён 187 нафарро ташкил медиҳад, ки 89 нафараш дар факултети санъати тасвирӣ таҳсил намуда, аз онҳо 41 нафараш духтарон мебошад. Дар факултети дизайн 99 нафар донишҷӯ ба таҳсил фаро гирифта шудаанд. 10 нафар донишкадаро бо баҳои хубу аъло хатм карданд. Дар нимсолаи аввал дар донишкада шуъбаи тайёрӣ ва маркази бачагонаи рассомӣ ташкил ёфта, бо ҷалби довталабон фаъолияти худро оғоз намудааст.