Корхонаи нави тавлиди регу шағал

Шуғнон, 4.08.2014. (АМИТ «Ховар», Файз Мирасан).- Дар ҷамоати Сучони ноҳияи Шуғнон корхонаи нави регу шагалбарорӣ ба фаъолият оғоз кард. Раиси нохияи Шуғнон Азиз Ғиёев дар маросими ифтитоҳи ин корхонаи истеҳсолӣ ширкат дошт ва аз кори коргарон изҳори каноатмандӣ намуд.Азиз Ғиёев иброз дошт, ки кишвари мо ба чунин корхонаҳои тавлидотӣ ниёзи зиёд дорад ва аз ин ру ҳукумати ҷумҳурӣ барои он соҳибкороне, ки ба мақсади бунёди корхонаи истеҳсолӣ ба кишвар таҷҳизот ворид месозад, як қатор имтиёзҳо низ муқаррар намудааст.Ҷамъияти масъулияташ маҳдуди «Панҷ», ки раҳбарии онро соҳибкор Насриддин Сабзалиев бар дӯш дорад, кӯшиш мекунад, то шумораи корхонаҳои истеҳсолии ин ҷамъиятро афзун гардонад. Ҷамияти «Панҷ» чанд сол пеш дар ин мавзеъ корхонаи хурди регу шагалбарорӣ сохта буд, ки дар соат ҳамагӣ 25 куб масолеҳ тавлид мекард. Ба гуфтаи директори генералии ин корхона Диловар Шогузанфаров бо боло рафтани талабот ба ин намуди масолеҳи бинокорӣ ҳоло иқтидори корхона ба 75 куб расонда шуд. Номбурда арз дошт, ки дар бунёди ин корхона тоҷирони эронӣ бо ихтисос додани маблағ дар шакли қарз саҳм гузоштаанд.Масъулини корхона бовар доранд ки баъди ду ё се сол қарзи мазкурро пурра пардохт хоҳанд кард. ҶДММ «Панҷ» ҳамчунин дар шаҳри Хоруғ ду корхона, ки яке ҳасиб ва дигаре оби минералӣ истеҳсол мекунад, бунёд намуда, даҳҳо нафар аз сокинони шаҳрро ба кор ҷалб кард.