Марҳилаи ниҳоии мусобиқаи қаҳрамонии Осиё-2014

Душанбе, 11.08.2014. (АМИТ «Ховар», Ситораи Боймурод).- Дастаи мунтахаби футболи наврасони то 14-солаи Тоҷикистон дар мусобиқаи қаҳрамонии Осиё-2014 дар Эрон ноком шуд. Мунтахаби наврасони футболи Тоҷикистон (U-14) дар сабқати гурӯҳии марҳилаи ниҳоии мусобиқаи қаҳрамонии Осиё-2014, ки аз 4-ум то 9-уми август дар шаҳри Ҳамадони Эрон барпо гардид, аз ҳаққи ширкат дардаври баъдӣ маҳрум гашт.Тавре дар ин бора Кумитаи олимпии кишвар хабар додааст, футболбозони навраси тоҷик бо раҳбарии сармураббӣ Раҷаб Расулов дар гурӯҳи «В» 5-уми август аз дастаи Тайланд бо ҳисоби 1-2 шикаст хӯрда, 7-уми август бозиро бо мунтахаби Ироқ бо ҳисоби мусовии 1-1 анҷом доданд ва дар бозии севум 9-уми август аз дастаи Кореяи Ҷанубӣ бо ҳисоби 0-2 мағлуб шуданд. Ба ин тартиб, мунтахаби Тоҷикистон бо як имтиёз дар гурӯҳи «В» дар ҷойи охирин қарор гирифт. Аз ин гурӯҳ дастаҳои мунтахаби Ироқ (7 имтиёз) ва Кореяи Ҷанубӣ (6 имтиёз) ба нимфинал баромаданд. Аз гурӯҳи «А» футболбозони навраси Кореяи Шимолӣ (7 имтиёз) ва Эрон (6 имтиёз) ба даври баъдӣ роҳ ёфтанд. Ҳамин тариқ, имрӯз, 11-уми август, дар даври ниманиҳоӣ Кореяи Шимолӣ бо Кореяи Ҷанубӣ ва Ироқ бо Эрон рақобат мекунанд. Бозии ниҳоӣ барои унвони қаҳрамонӣ 13-уми август баргузор мешавад.