Марзшикан ба ҳалокат расид

Хоруғ, 1.08.2014. (АМИТ «Ховар» ,Файз Мирасан).- Кормандони Раёсати Кумитаи амнияти миллии ҷумҳурӣ дар ВМКБ дар ҳамдастӣ бо сарҳадбонони қисми марзбонии 2848 дар натиҷаи анҷом додани як амалиёти фаврӣ-ҷустуҷӯӣ аз убури ғайрқонунии марз дар ноҳияи Рушон ҷилавгирӣ намуданд.  Марзшикан аз самти деҳаи Почвари вулусволии Шуғнони вилояти Бадахшони Афғонистон бо истифода аз камераи мошин ба ин сӯи соҳил, деҳаи Баррӯшони ноҳияи Рӯшони вилояти Бадахшони Тоҷикистон талоши гузаштан дошт. Бо вуҷуди торикии шаб марзбонони тоҷик хар як ҳаракаташро таҳти назорат гирифта, ҳангоми ба соҳил баромадан ӯро қаблан огоҳ намуданд. Аммо марзшикан ба огоҳии марзбонон аҳамият надода, баръакс мухолифат нишон дода, ба сӯи марзбонон аз автомати Калашников тир кушод ва кушиши фирор аз ҷои ходисаро кард. Бар асари тирпарронии дуҷониба марзшикан аз пой дароварда шуд ва дар макони ҳодиса ба ҳалокат расид. Аз марзбонон касе осеб надид. Ҳангоми таҳқиқ аз макони ҳодиса як адад автомати Калашников бо 18 дона тир, 5 адад бастаи селофанӣ пайдо шуд. Дар даруни бастаҳои селофанӣ маводи хокистарранги монанд ба афюн, ки 5 килограмм вазн дошт,дарёфт гардид. Аз рӯи ҳодисаи мазкур парвандаи ҷиноӣ боз шуда, таҳқиқот идома дорад.