Муҳимтарин ахбори олам
Душанбе, 26.08.2014. (АМИТ «Ховар», Иброҳими Ҳабибуллоҳ).- Президентони Русияву Украина Петро Порошенко ва Владимир Путин имрӯз, 26 август дар нишасти сарони Иттиҳодияи гумрукӣ дар Минск ширкат варзиданд. Бояд гуфт, ки дар нишасти мазкур Президенти Беларус Александр Лукашенко ва Президенти Қазоқистон Нурсултон Назарбоев, аъзои Иттиҳодияи гумрукӣ ва ҳам намояндагони Иттиҳодияи Аврупо ширкат мекунанд. Душанбе, 26.08.2014. (АМИТ «Ховар»).-Раисиҷумҳури Афғонистон дар мулоқот бо Ян Кубиш, намояндаи вижаи СММ рӯзи шанбеи ҳафтаи гузашта таъкид кардааст, ки 2 сентябри соли равон муҳлати ниҳоии маросими савгандёдкунии президенти нав буда ва ин вақти муайяншуда қобили тамдид нест. Вай гуфтааст, тӯлонӣ шудани раванди интихобот ба вазъи амниятӣ ва иқтисодии кишвар таъсири манфӣ гузоштааст. Душанбе,26.08.2014. (АМИТ «Ховар»).-Бахшида ба 23-юмин солгарди истиқлоли Ҷумҳурии Украина дар майдони Истиқлоли Киев, маъруф ба Майдон якуним ҳазор сарбозу афсар ширкат карданд ва неруҳои мусаллаҳи Украина бо намоиши тӯпхонаву системаҳои мушакӣ қудрати худро ба намоиш гузоштанд. Президенти кишвар Петро Порошенко дар суханронии худ гуфт, ки Украина барои мусаллаҳу муҷаҳҳаз кардани артиши давлаташ дар солҳоим 2015-2017 зиёда аз 3 миллиард доллар харҷ хоҳад кард.Душанбе, 26.08.2014. (АМИТ «Ховар»).- Рӯзи шанбеи ҳафтаи равон шабакаи телевизионии Ал-Ҷазира гуфтааст, Вазорати амнияти Курдистони Ироқ гузориш додааст, ки садҳо неруи низомии Эрон барои ҷанг бо неруҳои «Давлати исломӣ»-и Ироқ вориди хоки Ироқ шудаанд. Вале дафтари матбуоти Вазорати умури хориҷӣ мегӯяд, ки Ҷумҳурии Исломии Эрон ҳеҷ гуна неруи низомӣ ба Ироқ нафиристодааст ва барномае дар ин бора надорад.