Омодагии Душанбе ба Саммити Сарони СҲШ

Душанбе, 12.08.2014.(АМИТ «Ховар», Марзия Саидзода).- Душанбе ба ҷашнҳои бузурги миллӣ — таҷлили 23-умин солгарди Истиқлолияти давлатии Ҷумҳурии Тоҷикистон, 90-солагии Душанбе ва дар сатҳи баланд баргузор намудани ҷаласаи навбатии Шӯрои Сарони кишварҳои аъзои Созмони ҳамкории Шанхай омодагии ҷиддӣ мебинад. Дар ин росто зимни баргузории ҷаласаи ихтисосӣ раиси шаҳри Душанбе Маҳмадсаид Убайдуллоев роҳбарони 16 меҳмонхонаи давлатию хусусӣ ва кулли бозорҳои шаҳрро муваззаф намудааст, ки ҷиҳати қабул ва дар сатҳи баланд хизмат расонидан ба меҳмонҳо омодагии ҷиддӣ гиранд. Ҳамзамон раиси шаҳр аз фаъолияти роҳбарону масъулини сохторҳои пойтахт ҷиҳати тозаю озода, сабзу хуррам гардонидан, ба тартиб даровардани намои биноҳо, таъмири роҳу пиёдаравҳои маҳаллаю шаҳракҳо ва иншооти ғайриқонунӣ изҳори нигаронӣ намуда, дастур додааст, ки фаъолияташонро бознигарӣ намуда, ҳар рӯз соати 18:30 оид ба корҳои анҷомдодаашон ба раиси шаҳр иттилоъ ироа созанд.