Рушди ҳамкории милитсия бо ҷомеа

 
Душанбе, 18.08.2014. (АМИТ «Ховар», Муқаддас Темурзода).- Ҳафтаи сипаригардида дар доираи Барномаи Эмерҷенс Груп дар Тоҷикистон,  дар шаҳри Душанбе машғулиятҳои омӯзишӣ аз рӯи 17 мавзӯъ бо ёварони сардорони Раёсати ВКД ва шуъбаи ВКД дар шаҳру ноҳияҳо оид ба кор бо ҷомеа гузаронида шуданд. Дар машғулиятҳо кормандон аз таҷрибаи ҳамкорӣ бо ҷомеа, ки тайи солҳои охир омӯхта шудааст, бо ҳамдигар мубодила намуданд. Зимни машғулиятҳо дастуру супоришҳои вазири корҳои дохилӣ, ки бевосита барои тақвият бахшидани ҳамкории милитсия бо ҷомеа пешбинӣ гардидаанд, бозомӯзӣ шуд.
Тавре ки ВКД ҶТ хабар медиҳад, то имрӯз дар 17 шаҳру ноҳияи ҷумҳурӣ 32 маркази ҳамкории милитсия бо ҷомеа дар биноҳои замонавӣ ташкил гардида, ба истифода дода шудааст, ки онҳо бо тамоми воситаҳои техникӣ ва таҷҳизоти замонавии корӣ, аз қабили мизу курсӣ, компютер, телевизор, телефон, кондитсионер, принтер, проектор, камера, дастгоҳи аккосӣ муҷаҳҳаз мебошанд.