Шаҳристон: оғози ҷаласа дар самти фаъолияти фаврӣ-ҷустуҷӯӣ

 Душанбе, 18.08.2014. (АМИТ «Ховар», Муқаддас Темурзода).-Имрӯз бо ташаббуси роҳбарияти Вазорати корҳои дохилӣ дар ноҳияи Шаҳристони вилояти Суғд семинар-ҷаласа дар мавзӯи «Коркарди фаврӣ-агентурӣ: ташкил ва тактикаи мубориза бар зидди гурӯҳҳои муташаккили ҷиноятӣ» оғоз гардид. Тибқи иттилои ВКД ҶТ, семинар-ҷаласа то 20-уми августи соли равон идома ёфта,  он асосан ба самти фаъолияти фаврӣ-ҷустуҷӯӣ бахшида шудааст.
Дар семинар намояндагони мақомоти ҳифзи ҳуқуқи кишвар, аз ҷумла аз ҷузъу томҳои Вазорати корҳои дохилӣ, Кумитаи давлатии амнияти миллӣ, Вазорати мудофиа, Агентии назорати давлатии молиявӣ ва мубориза бо коррупсия, Агентии назорати маводи нашъадор, Хадамоти гумрук, Сарраёсати иҷрои ҷазои ҷиноятии Вазорати адлия ва Гвардияи миллии Ҷумҳурии Тоҷикистон иштирок доранд.