«SHERATON» дари худро боз менамояд

Душанбе, 08.08.2014.(АМИТ “Ховар”,Марзия Саидзода).-Дар остонаи ҷашни Истиқлолияти давлатии Ҷумҳурии Тоҷикистон ва 90-солагии пойтахт дар Душанбе меҳмонхонаи панҷситорадори «SHERATON» бо масоҳати умумии беш аз 24 000 метри мураббаъ барои муштариён дари худро боз менамояд. Меҳмонхонаи «SHERATON» марбут ба ширкати маъруфи амрикоии “Starwood” буда, дар кӯчаи Айнии пойтахт бунёд карда шудааст. Он дорои 148 ҳуҷра ва беҳтарин хизматрасониҳост. Бояд тазаккур дод, ки ширкати “Starwood” дар 100 кишвари ҷаҳон беш аз 1100 меҳмонхонаю истироҳатгоҳҳо дорад, ки қисмати бештараш таҳти тамғаи «SHERATON» фаъолият менамоянд.