Сохтмони ипподром дар Султонобод

Душанбе, 01.08.2014. (АМИТ «Ховар», Ҳотами Шариф). Дар мавзеи Султонободи ноҳияи Рӯдакӣ сохтмони ипподроми ҷумҳуриявӣ дар масоҳати 22 гектар бомуваффақият идома дорад.Ҳукумати Ҷумҳурии Тоҷикистон ба рушди соҳаи асппарварӣ диққати ҷиддӣ медиҳад. Дар ин бобат барномаи махсус барои солҳои 2009-2016 қабул гардидааст, ки ба пешравии соҳаи асппарварӣ мусоидат мекунад. Мутобиқи қарори мазкур соли ҷорӣ аз буҷети ҷумҳурӣ 250 ҳазор сомонӣ ҷудо гардид, ки 20 сар аспҳои зотӣ харидорӣ гардида, ба Корхонаи воҳиди давлатии ҷумҳуриявии «Асппарвар» дастрас карда шуд. Аз корхонаи мазкур бо мақсади хушзот кардани зоти аспҳо ба дигар корхонаҳои ҷумҳурӣ аспҳои беҳтарин фиристода шуд. Дар асоси дастуру супоришҳои Президенти Ҷумҳурии Тоҷикистон ҷиҳати амалӣ намудани барномаи рушди соҳаи асппарварӣ бахшида ба иди байналмилалии Наврӯз дар якҷоягӣ бо мақомоти иҷроияи ҳокимияти давлатии вилоятҳои Суғду Хатлон ва ноҳияи Рашт санаи 22, 23 ва 26 марти соли ҷорӣ пойга гузаронида шуд. Дар вилояти Хатлон 65 сар асп, вилояти Суғд 74 сар асп ва ноҳияи Рашт 26 сар аспҳои беҳтарини зотҳои тоҷикӣ ва англисӣ ширкат варзиданд, ки ғолибони чорабинӣ бо диплому сипоснома ва тӯҳфаҳои таъсисдодаи кумитаи тадорукот сарфароз гардиданд.