Сокинони вилояти Суғд ба кори мавсимӣ сафарбар шуданд

Душанбе, 22.08.2014. (АМИТ «Ховар», Лайло Тоирӣ).- Дар  вилояти Суғд сафарбаркунии навбатии муҳоҷирони меҳнатӣ аз ҷониби субъектҳои хоҷагидор роҳандозӣ шуд. Дар моҳи июли соли равон  ҶДММ «Нақлиёт» ва СИ «Маҳмудов» сокинони шаҳру ноҳияҳои Конибодом, Хуҷанд, Ҷ.Расулов, Исфара ва Аштро  ба вилояти Тюмен ва шаҳри Сургут  сафарбар намуданд.
Ҳамчунин моҳи  августи соли ҷорӣ ҶДММ «Нақлиёт» 10 — нафар муҳоҷирони меҳнатиро ба шаҳрҳои Сургут ва Екатеринбург фиристод.
Тибқи шартномаи меҳнатӣ, муҳоҷирон вазифадоранд муддати як сол дар Федератсияи Русия фаъолияти меҳнатӣ намоянд.
Дар ин радиф ҶДММ «Умури меҳнатии ихтиёрии ҷавонон» низ 60 нафар сокини вилояти Суғдро дар вилояти Маскав бо кори мавсимӣ таъмин намуд.
Дар ин бора аз шуъбаи муносибатҳои байналмилалӣ, робита бо ҷомеа ва ҳамватанони бурунмарзӣ хабар доданд.