Тарғиби либос аз матои табиӣ

Душанбе, 29.08.2014. (АМИТ «Ховар», Мавҷуда Анварӣ).-  26 сентябри соли равон дар шаҳри Хуҷанд бо мақсади эҳё намудани ҳунарҳои мардумӣ ва меҳнати хонагии занон, тарғиби либос аз матои табиӣ, бо истифодаи услубҳои миллии дӯзандагӣ, ривоҷу равнақ бахшидани истеҳсоли матои атлас ва адраси дастибоф, татбиқи сиёсати давлат дар ҷодаи дастгирии занону духтарон, ба муносибати 20-солагии Сарқонуни кишвар дар шаҳри Хуҷанд озмуни шаҳрии «Адрас ва атласи Хуҷанд-2014» баргузор мегардад.
Тибқи иттилои мақомоти иҷроияи шаҳри Хуҷанд, тамоми идораву шуъбаҳо ва бахшҳои мақомоти иҷроия якҷоя бо ташкилотҳои ҷамъиятӣ ва иттиҳодияҳои эҷодӣ вазифадор шуданд, ки силсилаи чорабиниҳоро ташкил намуда, барои тарғибу ташвиқи беҳтарин анъанаҳои либоси миллӣ, замонавӣ ва пурмазмун гузаронидани чорабиниҳои шаҳрии Иди «Атлас ва адраси Хуҷанд-2014» тадбирҳои мушаххас андешанд. 
Барои дар сатҳи баланд ва хотирмон гузаронидани ин чорабинӣ ҳайати кумитаи тадорукот иборат аз 16 нафар ташкил шуда, Умеда Муродова, муовини раиси шаҳри Хуҷанд роҳбарии кумитаи тадорукотро ба зимма дорад.