Утоқи кории созмони НКБ дар Қӯрғонтеппа

Душанбе, 20.08.2014. (АМИТ «Ховар», Лайло Тоирӣ).- Ба наздикӣ кормандони Раёсати Хадамоти муҳоҷират дар вилояти Хатлон бо намояндагони Ташкилоти Наҷоти Кўдакони Байналмилалӣ (НКБ) ва ҳамоҳангсози лоиҳа аз Созмони байналмиллалии муҳоҷират (СБМ) дар Ҷумҳурии Тоҷикистон мулоқот намуданд. Дар вохўрӣ иштирокчиён доир ба мақсади асосии лоиҳа ва уҳдадориҳои тарафайн, ки тибқи муқаррароти ин Ёддошт муайян гардидаанд, аз наздик шинос шуда, ҷиҳати сари вақт амалӣ шудани ҳамаи чорабиниҳои пешбинишуда таклифу пешниҳодҳо ироа карданд. Бино ба иттилои Шуъбаи муносибатҳои байналмилалӣ, робита бо ҷомеа ва ҳамватанони бурунмарзии Хадамоти муҳоҷирати Вазорати меҳнат, муҳоҷират ва шуғли аҳолӣ, Раёсат тасмим гирифтааст рўйхати оилаҳои осебпазири шаҳри Қӯрғонтеппаро муайян намуда, рўзҳои наздик як утоқи корӣ ба ҳуқуқшиносон ва мутахассисони ташкилоти Наҷоти Кўдакони Байналмилалӣ (НКБ) пешниҳод намояд. Лозим ба ёддоварист, ки ҳамкориҳои байналмилалии Раёсати Хадамоти муҳоҷират дар вилояти Хатлон бо созмонҳои байналмилалӣ ва ҷамъиятӣ сол то сол густариш ёфта, бо мақсади омўзиш ва тақвияти хизматрасонӣ ба кўдакони бепарастори оилаҳои муҳоҷирон дар шаҳру ноҳияҳои Қўрғонтеппа, Кўлоб, Хуҷанд, Айнӣ, Тоҷикобод ва Ҳисор байни Вазорати меҳнат, муҳоҷират ва шуғли аҳолии Ҷумҳурии Тоҷикистон, ташкилоти Наҷоти Кўдакони Байналмилалӣ ва Созмони байналмилалии муҳоҷират дар Ҷумҳурии Тоҷикистон, Ёддошти тафоҳум моҳи майи соли равон ба имзо расида буд.