«Як гули садбарг» — туҳфа ба хонанда

Душанбе, 11.08.2014. (АМИТ «Ховар», Муқаддас Темурзода). — Китоби нави ашъори узви Иттифоқҳои журналистон ва нависандагони Точикистон Иззатбеки Идизод — «Як гули садбарг» аз чоп баромад. Дар ин маҷмӯа шеърҳои ба тозагӣ эҷоднамуда ва чанд тарона аз китобҳои «Шаббода», «Духтари шаб», «Ҳаваси сабз»-и шоир гирд оварда шудааст. Бобҳои «Меҳри диёр», «Гулӯгиря», «Эй мард, гар намоз мехонӣ, ту» андеша ва мушоҳидаҳои боризи шоирро дар боби паҳлӯҳои гуногуни зиндагии пурмуаммои имрӯза фаро гирифтааст. Бояд зикр намуд, ки тозакориҳои адиби хушзавқ ба мисли «Хокпартовон», «Гўрков», «Тафовут» аз ҷумлаи мавзӯъҳои наве мебошанд, ки дигар қаламкашон нагуфтаанд. «Як гули садбарг»-и шоир бешубҳа димоғи дўстдорони каломи бадеъро хушу муаттар хоҳад кард.