Ҳасани Рўҳонӣ- узви хориҷии Академияи илмҳои Тоҷикистон

Душанбе, 10.09.2014. (АМИТ «Ховар», Бекназари Абӯбакр). — Шоми 10 сентябр Президенти Ҷумҳурии Исломии Эрон Ҳасани Рўҳонӣ дар доираи сафари расмии худ ба Тоҷикистон ба Академияи илмҳои Ҷумҳурии Тоҷикистон ташриф оварда, бо олимон ва донишмандон мулоқот намуд.
Ба иттилои котиби матбуоти АИ ҶТ Л. Латифӣ дар ин мулоқот намояндагони Вазорати маориф ва илм, Иттифоқи нависандагон, кормандони Раёсати Академияи илмҳо, директорони институтҳову марказҳои илмии АИ ҶТ ва донишгоҳу донишкадаҳои кишвар ширкат намуданд.
Чорабиниро раиси Маҷлиси намояндагони Маҷлиси Олии кишвар Шукурҷон Зуҳуров ифтитоҳ намуда, доир ба робитаҳои фарҳангии Тоҷикистону Эрон сухан ронд.
Президенти Академияи илмҳои Ҷумҳурии Тоҷикистон Фарҳод Раҳимӣ ташрифи Президенти Ҷумҳурии Исломии Эронро ба ин даргоҳи муқаддаси илми тоҷик хайрамақдам намуда, ба доктор Ҳасани Рўҳонӣ дипломи узви хориҷии Академияи илмҳои Ҷумҳурии Тоҷикистонро бо тантана супорид.
Ҳасани Рўҳонӣ аз ташрифи худ ба Ҷумҳурии Тоҷикистон изҳори қаноатмандӣ намуда, иброз дошт, ки ҳамкориро дар тамоми соҳаҳо, махсусан дар соҳаи илму истеҳсолот бо Тоҷикистон боз ҳам мустаҳкамтар ва дар оянда равобити умумии ин ду кишвари ҳамзабонро густурдатар ба роҳ хоҳад монд.
Дар охир Фарҳод Раҳимӣ ба меҳмони олиқадр Ҳасани Рўҳонӣ чанд китоби илмии олимони Академияро ҳадя намуда, ҷомаи зардўзии тоҷиконаеро ба эшон пўшонид.