Ҳ.Рӯҳонӣ: «Ҳамкориҳои ду кишвар дар оянда рушд хоҳанд ёфт»

 
Душанбе, 11.09.2014.(АМИТ «Ховар», Марзия Саидзода).- Тавсеаи равобити ҳасанаи Ҷумҳурии Тоҷикистон бо Ҷумҳурии Исломии Эрон дар бахшҳои мухталиф, бахусус парлумонӣ дар ҷараёни мулоқоти  Шукурҷон  Зуҳуров-раиси Маҷлиси намояндагони Маҷлиси Олии Ҷумҳурии Тоҷикистон  бо Ҳасани Рӯҳонӣ, Президенти Ҷумҳурии  Исломии  Эрон дар Душанбе баррасӣ гардид.
        Шукурҷон Зуҳуров таъкид намуд, ки равобити парлумони ду кишвар солҳои охир беш аз пеш рушд меёбанд. Фаъолияти гурӯҳҳои дӯстӣ-байнипарлумонӣ ва сафари ҳайатҳои парлумонии Тоҷикистону Эрон ба кишварҳои ҳамдигар дар таърихи равобити Тоҷикистону Эрон саҳифаи наверо боз хоҳад кард.
     Ш. Зуҳуров таъкид кард, ки «Эрон  нахустин кишварест, ки истиқлолияти давлатии Тоҷикистонро ба расмият шинохт ва моҳи январи соли 1992  Сафорати худро дар Душанбе ифтитоҳ кард”.Зикр шуд, ки байни Тоҷикистону Эрон беш аз 100 санади муҳими байнидавлатӣ ба имзо расонида шудааст, ки ин аснод дурнамои муносибатҳои ду кишвари дӯсту ҳамзабонро муайян месозад. Алҳол дар минтақаҳои мухталифи Тоҷикистон беш аз 150 ширкату корхонаҳои муштарак  фаъолият доранд.
   Таъкид гардид, ки бунёди роҳи оҳани Эрон — Афғонистон — Тоҷикистон, роҳи мошингард ва хатти интиқоли барқи Эрон — Афғонистон — Тоҷикистон иқдоми наҷиб ва фоли некест аз дурнамои тавсеаи ҳамкориҳои се кишвари форсизабон. Дар оянда сохтмони хати лӯлаи  интиқоли  об аз Тоҷикистон ба Эрон ва газ аз Эрон ба Тоҷикистон намунаи барҷастаи равобити  ҳамкориҳои Тоҷикистону Эрон хоҳад буд. Инчунин ҷонибҳо ба истифода додани  Неругоҳи барқи обии “Сангтӯда-2”-ро намунаи олии ҳамкориҳои Тоҷикистону Эрон арзёбӣ карданд. Шукурҷон Зуҳуров таъкид кард, ки сафари   Шумо дар таърихи равобити ду кишвари бародар, ҳамзабон ва ҳамфарҳанг саҳифаи наверо боз хоҳад кард.
              Ҳасани  Рӯҳонӣ, Президенти Эрон изҳор дошт: ”итминон дорам, ки миёни давлатҳо ва парлумонҳоямон бо истифода аз шароити мусоид ҳамкориҳои судманд беш аз пеш густариш хоҳанд ёфт. Ҳасани Рӯҳонӣ аз иштироки фаъоли ҳар ду кишвар дар ҳамкориҳои минтақавӣ, бахусус дар доираи Созмони ҳамкориҳои иқтисодӣ (ЭКО),Созмони Конфронси Исломӣ (ОИК) ва рушди ҳамкориҳои илмию фарҳангӣ изҳори қаноатмандӣ намуда,  ҳамкориҳои парлумонӣ, иқтисодию тиҷоратиро меҳвари асосии густариши муносиботи Тоҷикистону Эрон арзёбӣ намуд.