Ҷаласаи 10-уми Иттиҳоди байнибонкии СҲШ дар Душанбе

Душанбе, 15.09.2014. (АМИТ «Ховар», Лайло Тоирӣ).- Ба наздикӣ дар шаҳри Душанбе Ҷаласаи 10-уми Иттиҳоди байнибонкии Созмони Ҳамкории Шанхай бо иштироки раисон ва гурӯҳҳои кории бонкҳои узви ин созмон: «Бонки Рушди Қазоқистон», «Бонки Рушди Хитой», «РСК Банк» аз Қирғизистон, «Внешэкономбанк» аз Русия ва ҳамчун Бонки раисикунандаи ин Иттиҳод дар солҳои 2013-2014 Бонки давлатии амонатгузории Ҷумҳурии Тоҷикистон «Амонатбонк» ва бонки шарик «АСБ Беларусбанк» баргузор гардид. 
Бино ба иттилои хадамоти матбуоти бонк, раиси раёсати БДА ҶТ «Амонатбонк» Ҷамшед Нурмаҳмадзода оид ба натиҷаҳои кории фаъолияти Иттиҳоди байнибонкии Созмони Ҳамкории Шанхай дар давраи раёсати «Амонатбонк» дар солҳои 2013-2014 дар ин Иттиҳод маърӯза намуд. 
 Дар  ҷаласа масъалаи ба имзо расонидани «Нақшаи чорабиниҳо оид ба мустаҳкамгардонии ҳамкориҳои молиявӣ барои рушди минтақа» баррасӣ гардид. 
 Қобили зикр аст, ки ин масъала то ҷое ҳамкориҳоро дар самти рушд ёфтани лоиҳаҳо ва инфрасохторҳои минтақаҳоро дар тамоми давлатҳои узви Созмон густариш медиҳад. 
 Дар ин ҷаласа «Тартиб дар бораи ҷобаҷогузорӣ ва фаврӣ фаъолият намудани ИБ СҲШ ва пайдарпаии пешниҳоди маълумот ва ҳуҷҷатҳо ҳангоми қабули раисӣ аз як бонк ба бонки дигари аъзои ИБ СҲШ  қабул гардид. 
 Тарафҳо аз ҳамкориҳо бо котиботи СҲШ ҷиҳати ба фаъолияти ИБ СҲШ ҷалб намудани ташкилотҳои молиявии давлатҳое, ки дар СҲШ ваколатдор ҳастанд, изҳори қаноатмандӣ намуданд. Оид ба натиҷаи ҳамкориҳо дар масъалаи тайёр намудани кадрҳо ва такмили ихтисоси мутахассисон, ки самти муҳими қавӣ гардонидани ҳамкориҳои мутақобилаи бонкҳои узви Иттиҳоди байнибонкии СҲШ мебошад баҳои баланд дода шуд ва зикр гардид, ки ин масъала дар оянда низ бояд густариш ёбад.