Ҷашни истиқлолияти Тоҷикистон дар Покистон

Душанбе, 25.09.2014. (АМИТ “Ховар”, Мавҷуда Анварӣ).-22 сентябри соли 2014 дар меҳмонхонаи Серенаи шаҳри Исломобод чорабинии расмии Сафорати Ҷумҳурии Тоҷикистон дар Ҷумҳурии Исломии Покистон бахшида ба 23-юмин солгарди Рӯзи истиқлолияти Ҷумҳурии Тоҷикистон баргузор гардид.
Тибқи иттилои Вазорати корҳои хориҷии кишвар, дар чорабинӣ вазири федеролии иттилоот ва радиошунавонӣ, сенатор Парвиз Рашид, инчунин намояндагони сохторҳои ҳукуматӣ, парлумон, роҳбарияти Вазорати корҳои хориҷии Покистон,  доираҳои тиҷоратӣ ва илмиву ҷамъиятии кишвари иқомат, роҳбарони намояндагиҳои дипломатии хориҷии муқими Исломобод,  намояндагони хонадони шоири форсизабон Аллома Муҳаммад Иқбол ва аъзои ҷамъияти тоҷикони муқими музофотҳои мухталифи Покистон ширкат варзиданд.
Дар арафаи чорабинӣ дар васоити ахбори оммаи покистонӣ мавод оид ба рушди иҷтимоиву иқтисодӣ ва ҳамкории дуҷонибаи Тоҷикистону Покистон, аз ҷумла дар соҳаи энергетика ба нашр расиданд.
Дар доираи чорабинӣ   намоиши расмҳо оид ба мавзуъ ташкил  шуда, китобу нашрияҳо дар бораи Тоҷикистон, фаъолияти байналмилалии он ва мавод бахшида ба ҳамкории Тоҷикистону Покистон пешниҳод гардиданд. 
Инчунин филми видеоӣ роҷеъ ба саммити СҲШ, ки дар таърихи 11-12 сентябри соли ҷорӣ дар Душанбе барпо гашт, намоиш дода шуд.