Баррасии масоили муҳими ҳамкории Тоҷикистону Русия дар ҳамоиш

Душанбе, 20.09.2014.(АМИТ “Ховар”, Марзия Саидзода).- Интизор меравад, ки дар доираи баргузории Форуми  байнипарлумонии Тоҷикистону Русия, ки охири моҳи октябр дар Маскав таҳти унвони «Русия -Тоҷикистон: неруи ҳамкории байниминтақавӣ» баргузор мегардад, чор мизи мудаввар ташкил шавад.
      Мавзӯъҳои мизи мудаввар марбут ба рушди ҳамкориҳои иқтисодии байниминтақавӣ, минтақаҳои озоди иқтисодӣ ва низоми бонкӣ дар доираи татбиқи лоиҳаҳои инфрасохторӣ ва сармоягузорӣ, тавсеаи ҳамкориҳои Тоҷикистону Русия дар соҳаи кишоварзӣ, вазъ ва танзими ҳуқуқии раванди муҳоҷирати меҳнатӣ миёни Тоҷикистону Русия ва самтҳои рушди минбаъдаи робитаҳои башардӯстонаи Тоҷикистону Русия мебошанд.
 Бояд тазаккур дод, ки ҷиҳати омодагӣ ба Форуми чоруми байнипарлумонии Тоҷикистону Русия дар ҷумҳурӣ Кумитаи тадорукот созмон дода шудааст. Ба ҳайати Кумитаи тадорукот  муовинони Сарвазири ҷумҳурӣ ва роҳбарони вазорату сохторҳои марбутаи ҷумҳуриявӣ, раисони Вилояти Мухтори Кӯҳистои Бадахшон, вилоятҳои Суғду Хатлон, ки ҳамзамон муовинони раиси палатаи болои Парлумон ва раисони кумитаҳои марбутаи Маҷлиси миллӣ мебошанд, шомиланд.