Д.Саймиддинов: Вазифаи забоншиносон на танҳо таълим, балки таҳқиқи забон аст

 
Душанбе, 19.09.2014. (АМИТ «Ховар», Мавҷуда Анварӣ).- Имрӯз бахшида ба Рӯзи забони давлатӣ дар Кохи Ваҳдат таҳти унвони «Забони давлатӣ ва рушди истилоҳот» конфронси илмию ималӣ баргузор гардид. 
Дар ифтитоҳи конфронс раиси Кумитаи забон ва истилоҳот Гавҳар Шарофзода аҳли нишастро бо Рӯзи забон табрик намуда,  таъкид кард: «Садсолаи охир унсурҳои бегона ва қолабҳои вожасозии бегона дар забони мо роҳ ёфта, чунон забони моро махлут карданд, ки ин василаи корбурди ғанигардонии фонди луғавии забонӣ қариб буд моро аз меъёри забони адабии классикиамон дур созад.
Имрӯз вақти он расидааст, ки дар ҳамкориву мусоидат ва назорати пайвастаи Кумитаи забон ва истилоҳот бо ниҳодҳои илмӣ ва донишгоҳу донишкадаҳо мутахассисони соҳавӣ дар кори густаришу рушди забони давлатӣ ва ба ҳадафи барои ба забони илм комёб гардонидани забонамон фаъолияти самаранокро ба роҳ монанд, зеро ҳар як забон бо тозагиву беолоишӣ ва риояи меъёри суннатии худ ба дараҷаи забони илм расида метавонад». 
«Дар даврони истиқлолият барои рушди забони давлатӣ имкониятҳои бештар фароҳам омад. Таҷлили Рӯзи забон имсол ба дигар санаи муҳими фарҳангӣ, гиромидошти 600-солагии адиб, олим ва орифи бузурги машриқзамин Мавлоно Абдураҳмони Ҷомӣ рост меояд. Забон як ҷузъи муҳим ва ҷудонопазири фарҳанги миллӣ буда, моро дар масири таърих маҳз ба шарофати забон, осори илмию адабӣ ва фарҳангиямон мешиносанд. Забони модарӣ дар ҳама давру замон мояи ифтихор ва омили асосии ҳамбастагию ваҳдати миллӣ мебошад»,-афзуд зимни суханронӣ Мансур Суруш-мушовири калони бахши ёрдамчии Президенти ҶТ оид ба рушди иҷтимоӣ ва робита бо ҷомеа. 
Доктори илми филология, профессор Додихудо Саймиддинов зимни суханрониаш иброз намуд, ки: «Яке аз муваффақиятҳое, ки дар оянда кумита метавонад аз он бархурдор шавад, ҳамкорӣ бо Фарҳангистони забон ва адаби форсист. Мо дар ҷомеаи форсизабонон, ки имрӯз васоити ахбори гуногун дорад, шурӯъ аз BBC то Озодӣ, ба он баҳсҳое, ки ҳамарӯза миёни ин ҷавонон сурат мегиранд, бояд бо андешаи тоза нисбат ба масоили рушди забони тоҷикӣ ҳамчун як шохаи забони муштараки форсии дарӣ муносибат кунем, на ин ки бо таъсири забонҳои бегонаи минтақа, ки дар даврони мухталиф сурат гирифтааст, маҳдуд шавем. Ин ҳамон сиёсатест, ки ба иқболи миллати тоҷик Сарвари кишвари мо ин сиёсатро пеша кардаанд. 
Вазифаи мо забоншиносон ғайр аз таълими забон ин аст, ки мо бояд таҳқиқ кунем. Ман надидам, ки ягон забоншинос як истилоҳро гирифта, то ба охир таҳқиқ карда, шакли дурусти онро ба мардум пешкаш кунад. Мо одат кардем, ки чизеро ки  дар форсӣ гуфтаанд, оҳиста гирифта диҳем, агар инсоф дошта бошем, истинод мекунем, надошта бошем, намекунем». 
Дар конфронс 14 маърӯзаи илмӣ аз ҷониби мутахассисони бахшҳои гуногуни забон ва истилоҳшиносӣ мавриди баррасӣ қарор гирифта, доир ба масъалаҳои истилоҳот ва рушди забони давлатӣ ибрози назар шуд.
Дар анҷоми кори конфронс, инчунин натиҷаи озмуни «Мақолаи беҳтарин», ки аз ҷониби кумита ташкил шуда буд, ҷамъбаст гардида, ғолибони озмун бо туҳфаҳо қадрдонӣ шуданд.