Э. Раҳмон: «Сифати таълим ҷавобгӯи талаботи замон нест»

Душанбе, 1.09.2014. (АМИТ «Ховар», Мавҷуда Анварӣ).-  Имрӯз Президенти кишвар Эмомалӣ Раҳмон дар тантанаҳои Рӯзи дониш ва дарси сулҳ ширкат варзида, бо намояндагони сершумори соҳаҳои илму маорифи ҷумҳурӣ мулоқоти судманд анҷом дод.
Зимни суханрониаш Сарвари Давлат таъкид кард, ки аз таҳлилҳо бармеояд, сифати таълим ва омодагии касбии шогирдони донишгоҳ ҳанӯз талаботи замонаи пешрафтаро қонеъ карда наметавонад.
 Махсусан, паст будани сатҳи дониши хонандагони муассисаҳои таҳсилоти миёнаи умумии кишвар, ки онро бори дигар имтиҳонҳои қабули марказонидашуда аз тарафи Маркази миллии тестӣ нишон доданд, гувоҳи ин гуфтаҳост.
Натиҷаи имтиҳоноти қабул натиҷаи кори омӯзгорони муассисаҳои таҳсилоти миёнаи умумист, ки аксари онҳо хатмкардагони ин даргоҳ мебошанд.
Сардори Давлат Донишгоҳи давлатии омӯзгории Тоҷикистонро, ки ҳамчун манбаи асосиву пойгоҳӣ дар самти омода намудани омӯзгорон барои муассисаҳои таълимии кишвар муайян шуда, вазифаи таъмини методии дигар муассисаҳои таҳсилоти олии ихтисоси омӯзгориро ба дӯш дорад, вазифадор кард, ки дар ислоҳи ин камбудиҳо чораҷӯӣ намояд.