Гурӯҳҳои корӣ дар хидмати муҳоҷирони меҳнатӣ

Душанбе, 05.09.2014. (АМИТ «Ховар», Лайло Тоирӣ).- Вазорати меҳнат, муҳоҷират ва шуғли аҳолии Ҷумҳурии Тоҷикистон бо фармоиши вазир Сумангул Тағойзода  аз ҳисоби кормандони вазорат, хадамоту агентӣ гурӯҳҳои корӣ ташкил намуд.
Мақсад аз ташкили гурӯҳҳои корӣ гузаронидани вохӯрию суҳбатҳо бо фаъолон ва муҳоҷирони меҳнатӣ дар ҳамаи шаҳру ноҳияҳои ҷумҳурӣ оид ба талаботи нави қонунҳои Федератсияи Русия дар самти муҳоҷирати меҳнатӣ мебошад.
Вазорати меҳнат, муҳоҷират ва шуғли аҳолии ҶТ бодарназардошти талаботи бозори меҳнати Федератсияи Русия барои муҳоҷирони меҳнатӣ-шаҳрвандони Тоҷикистон  омӯзиши забони русӣ, таърих, асосҳои қонунгузории Федератсияи Русияро ба роҳ мондааст. Аз ҷумла,  иттилоотонии муҳоҷирони меҳнатиро бештар тақвият бахшида истодааст.