Имзои шартномаи нав

Душанбе, 11.09.2014. (АМИТ «Ховар», Марҳабои  Азамат). — Яке  аз  натиҷаҳои муҳимтарини ҷаласаи соҳибкорон  ва аҳли тиҷорати  СҲШ, ки  10  сентябр  дар  пойтахти  кишвар  оғоз ёфт,  иборат  аз  гуфтушунид  ва  имзои   шартномаи  байни Корхонаи  воҳиди давлатии ТАЛКО ва  ширкати  General Nice   Investment Limited — и  Чин ба  маблағи  30  миллион  доллари  ИМА  дар  бораи  бунёди  корхонаи  муштарак  оид ба  истеҳсоли блокҳои  катодӣ  буд.
Мақсади  асосии  ҷаласа, ки дар  он  намояндагони  аҳли  тиҷорат  ва молияи  давлатҳои аъзои  созмон ва давлатҳои мушоҳид  ширкат  доранд, иборат  аз вусъат  бахшидани  таваҷҷуҳи  мутақобила ва  густариши   равобити соҳибкорон,  аҳли тиҷорат ва  маблағгузорони  кишварҳои  аъзои  СҲШ мебошад. Ҷаласа  таҳти  шиори «Ҳамкорӣ, рушду  шукуфоии  муштарак» сурат  мегирад. 
Дар  маросими ботантанаи  ифтитоҳи  ҷаласа муовини  сарвазири  Ҷумҳурии  Тоҷикистон  Давлаталӣ  Саидов  сухани  табрикӣ  кард.
Раиси  Кумитаи  давлатии  сармоягузорӣ  ва идораи  амволи давлатии  ҶТ Қодири  Қосим  аз ҷониби  Тоҷикистон  дар  бораи  имкониятҳои  сармоягузорӣ дар Тоҷикистон   гузориш  дод.
Дар  ҷаласа  беш  аз 300  нафар соҳибкорони  кишварҳои  аъзои  СҲШ,   ҳамчунин  кишварҳои   мушоҳид  ва  мушорикон аз ҷумлаи Муғулистон,  Ҳиндустон  ва  ғайра  ширкат  доранд.