Иштироки 3 нафар аз ДДХ дар мусобиқоти Осиё

Душанбе, 15.09.2014. (АМИТ «Ховар», Раъно Нусратуллозода).- 3 нафар аз Донишгоҳи давлатии Хуҷанд (ДДХ) ба номи академик Бобоҷон Ғафуров:  Асрор Воҳидов, донишҷӯи соли дуюми  факултаи тарбияи ҷисмонӣ аз рӯи намуди бокс, Александр Проженко, магистранти соли аввали факултаи  телекоммуникатсия ва технологияи иттилоотӣ ва Кристина Проженко, омӯзгори факултаи тарбияи ҷисмонӣ аз рӯи намуди варзиши сабук аз  17 сентябр то 5 октябри соли равон дар бозиҳои Осиё, ки дар Кореяи Ҷанубӣ баргузор мегарданд,  иштирок менамоянд.
Тавре ки декани факултаи тарбияи ҷисмонии донишгоҳ Сайфулло Бойматов иттилоъ дод, донишҷӯи соли дуюми факулта  Ҳамроз Раҷабов  дар мусобиқаи ҷаҳон оид ба самбо байни наврасону ҷавонон, ки 15 октябри соли ҷорӣ дар Кореяи Ҷанубӣ баргузор мегардад, иштирок менамояд ва алҳол бо мураббиҳояш дар ин самт омодагӣ дорад. Факултаи тарбияи ҷисмонии донишгоҳ яке аз факултаҳои навтаъсис  буда, дар айни ҳол дар он  45 нафар омӯзгор фаъолият мебарад, ки аз он 7 нафар устоди варзиш, 15 нафар номзади устоди варзиш мебошад. Миқдори донишҷӯёни факулта 558 нафарро ташкил медиҳад, ки аз ин 3 нафар устоди варзиши байналмиллалӣ, 21 нафар устоди варзиш, 28 нафар номзад ба устоди варзиш, 153 нафар варзишгари дараҷаҳои гуногунро дар бар мегирад.
Ҷоиз ба зикр аст, ки  чанде қабл дар 43-юмин мусобикаи анъанавӣ оид ба бокс  бахшида ба хотираи қаҳрамони Иттиҳоди Шӯравӣ Исмоил Ҳамзаалиев дар шаҳри Хуҷанд 1 нафар омӯзгор ва 5 нафар донишҷӯи донишгоҳ  иштирок карданд, ки  омӯзгори кафедраи тарбияи ҷисмонии умумидонишгоҳӣ Алиҷон Набиҷонов дар вазни 52 килограмм  ҷои 3-юмро ишғол намуд. Донишҷӯи курси 2 Асрор Воҳидов дар вазни 56 кг ширкат варзида, ғолиби ин мусобиқа гардид.