Истиқлолият ва Суруди миллӣ — ифтихори Тоҷикистон

Душанбе, 8.09.2014. (АМИТ “Ховар”, Ситораи Боймурод).- Бо дастгирии мақомоти иҷроияи ҳокимияти давлатии вилояти Суғд дар Донишгоҳи давлатии Хуҷанд бахшида ба 23 — солагии Истиқлолияти давлатии Ҷумҳурии Тоҷикистон ва 20 — солагии Суруди миллӣ таҳти унвони «Истиқлолият ва Суруди миллӣ — ифтихори Тоҷикистон» конфронси илмӣ — амалӣ доир гардид.
Тавре ки дар ин бора хадамоти матбуоти  раиси вилояти Суғд хабар додааст, зимни суханронӣ ректори ДДХ Ғ. Усмонов изҳор дошт, ки Истиқлолият ва Суруди миллӣ аз мафҳумҳои арзишноктарини миллати тоҷик эътироф гардида, мояи ифтихор  ва сарбаландӣ аст.  Дар конфронс ҳамчунин таъкид гардид, ки дастоварди пурарзиши замони соҳибистиқлолии кишвар барқарорсозӣ ва ташкили заминаҳои бунёдии соҳаи илму маориф, аз ҷумла навсозии инфрасохтори соҳа, ба раванди таълиму тарбия ворид намудани технологияҳои муосир ва ҷорӣ кардани шаклу усулҳои замонавӣ, инчунин омодасозии кадрҳо маҳсуб меёбад.
Ҳамзамон профессорон Абдуҷалил Бобокалонов ва Усмонҷон Ғаффоров дар мавзӯъҳои «Президент Эмомалӣ Раҳмон — поягузори сиёсати хориҷии Ҷумҳурии Тоҷикистон» ва «Аз таърихи таҳияи Суруди миллии Тоҷикистон» сухан гуфтанд.