«Муҳоҷират ва саломатӣ»-семинар

Душанбе, 1.09.2014. (АМИТ «Ховар», Лайло Тоирӣ).-  Ҳафтаи гузашта бо ташаббуси Раёсати Хадамоти муҳоҷирати Вазорати меҳнат, муҳоҷират ва шуғли аҳолии ҶТ дар вилояти Хатлон ва Созмони Байналмилалии Муҳоҷират семинари омўзишӣ дар мавзўи «Муҳоҷират ва саломатӣ» гузаронида шуд. Иштирокчиёни он  оид ба масъалаҳои муҳоҷирати меҳнатӣ, қонуну қоидаҳои муҳоҷират ва бемориҳои сирояткунанда маълумоти кофӣ гирифтанд. 
Роҳбари Маркази мусоидат ба муҳоҷирон вобаста ба қонунҳои нави ФР, дар хусуси донишу малака, забондонӣ ва маълумотнокии сокинони кишвар ва бемориҳои гузаранда сухан гуфт.
Мудирони бахшҳо аз шаҳрҳои Қўрғонтеппаву Сарбанд ва ноҳияҳои Вахшу Бохтар, А.Ҷомӣ, Ҷ.Румӣ дар семинар ширкат карда, илова намуданд, ки назар ба солҳои пешин кор дар самти фаҳмондадиҳии мардум нисбат ба муҳоҷирати меҳнатӣ, қоидаҳои сафар, тағйироту иловаҳо дар қонунҳои давлатҳои корфармо беҳтар гардидааст.
Дар ин бора  аз шуъбаи муносибатҳои байналмилалӣ, робита бо ҷомеа ва ҳамватанони бурунмарзии Хадамоти муҳоҷират иттилоъ доданд.