Муаррифии «Такрори таронаи борон»

Душанбе, 29.09.2014. (АМИТ «Ховар», Раъно Нусратуллозода).-Дар китобхонаи вилоятии оммавии ба номи Тошхоҷа Асирии шаҳри Хуҷанд муаррифии китоби тозанашри  устоди Донишгоҳи давлатии Хуҷанд ба номи академик Бобоҷон Ғафуров, шоир Нуралӣ Нурзод таҳти унвони «Такрори таронаи баҳор» доир гардид.
Дар ҷамъомад устодону олимони донишгоҳ Субҳони Аъзамзод, Маҳмадшо Маҳмадшоев, Мӯсо Олимҷонов, Баҳром Мирсаидов, Сурайё Ҳакимова, Ромиз Абдуллоев ва дигарон дар бораи фаъолияти эҷодии муҳаққиқ, шоир ва рӯзноманигори хушсалиқа Нуралӣ Нурзод, ки  наздики бист сол аст ба нақду таҳқиқ ва шарҳу маърифати осори адабӣ мепардозад, андешаҳояшонро баён намуданд. Зикр гардид, ки Нуралӣ Нурзод ба тарзи нав ва зинаҳои шеъри сапед алоқаманд буда, тавонист, ки дар сурудани он низ муваффақ шавад. 
Маҷмӯаи ашъори сеюми Нуралӣ Нурзод «Такрори таронаи борон» таҷассумгари афкори шоирона ва маҳсули таҷрибаи андӯхтаи ӯ дар коргоҳи эҷоду маърифаташ ба ҳисоб меравад. Аз намунаҳои ашъори шоир маълум мегардад, ки Нуралӣ Нурзод ба ҳаёти ҷомеаи кунунии мо дидгоҳҳои хоси хешро дорад. Ҳамин равиш ва нигоҳи хосса барои ноил шудан ба истиқлоли назараш ёрмандӣ намудааст.