Муборизаи Тоҷикистону Эрон бар зидди маводи мухаддир

Душанбе, 6.09.2014. (АМИТ «Ховар», Мавҷуда Анварӣ).-Масъалаҳои рушди ҳамкорӣ байни Агентии назорати маводи нашъаовари назди Президенти ҶТ ва Ситоди мубориза бар зидди маводи мухаддири Ҷумҳурии Исломии Эрон дар мулоқоти муовини директори агентӣ Ҳалимҷон Маҳмудзода бо мудири кулли умури байналмилалии Ситоди мубориза бар зидди маводи мухаддири Ҷумҳурии Исломии Эрон Маҳмуди Баёт, ки дирӯз дар шаҳри Душанбе доир шуд, баррасӣ гардиданд. Инчунин масъалаи кушодани ҷиноятҳои вобаста ба паҳн намудани маводи нашъаовари синтетикӣ муҳокима гардида, ҷонибҳо зикр карданд, ки ин амалҳои номатлуб ҷомеаро бетараф монда наметавонанд, чунки маводи нашъаовари синтетикӣ асосан дар муассисаҳои дилхушӣ дар байни ҷавонон паҳн мешаванд ва оқибат ба генофонди миллат таъсири манфӣ мерасонанд. Зимни вохӯрӣ Ҳ. Маҳмудзода иттилоъ дод, ки танҳо дар соли ҷорӣ аз тарафи кормандони агентӣ якчанд ҷинояти вобаста ба паҳн намудани маводи нашъаовари синтетикӣ пешгирӣ шуд ва аъзои гурӯҳҳои ҷиноятпеша, ки бо интиқоли маводи нашъаовари синтетикӣ ба қаламрави ҷумҳурӣ машғул буданд, дастгир шуданд. Маҳмуди Баёт барои ҳамкорӣ арзи сипос карда, изҳори боварӣ намуд, ки ҳамкориҳо дар оянда боз ҳам мустаҳкам хоҳанд гардид.