Мусобиқаи варзишӣ бахшида ба Истиқлолият

Душанбе, 1.09.2014. (АМИТ «Ховар», Лайло Тоирӣ).-  Бахшида ба 23-юмин солгарди Истиқлолияти давлатии Ҷумҳурии Тоҷикистон ва бо фармони вазири мудофиаи мамлакат рӯзҳои 28-ум ва 29-уми августи соли равон байни хизматчиёни ҳарбии қисмҳои низомии гарнизони Душанбе мусобиқаи варзишӣ доир гардид.
Мусобиқаи мазкур бо иштироки масъулини соҳа ва Оркестри ҳарбии Вазорати мудофиа дар Клуби марказии варзиши артиш «Политехникум» ҷараён гирифта, он аз рӯи намудҳои футбол ва бисёрҳарба — давидан ба масофаи 100 м, турниккашӣ, инчунин дигар намудҳои варзиши сабук ба роҳ монда шуд.
Лозим ба ёдоварист, ки ташкили ин гуна мусобиқаҳои варзишӣ дар таҳкими дӯстию рафоқат байни хизматчиёни ҳарбӣ нақши муассир гузошта, тарғибгари тарзи ҳаёти солим мебошад ва дар рушду нумӯи равонӣ ва ҷисмонии сарбозон мусоидат мекунад.
Ҷараён ва даври ниҳоии мусобиқаро масъулини дахлдори соҳа ва аъзои ҳакамон назорат намуда, онро холисона ҷамъбаст намуданд. Ғолибон ва ҷоизадорони мусобиқа бо ифтихорнома ва туҳфаҳои хотиравии Клуби марказии варзиши артиши Вазорати мудофиаи Ҷумҳурии Тоҷикистон сазовор гардиданд.
Дар ин бора аз Маркази матбуоти Вазорати мудофиа иттилоъ доданд.