«Рассомони наврас»-ҷашнвораи ҷумҳуриявӣ

Душанбе, 25.09.2014.(АМИТ «Ховар», Зарангези Латиф).- Бо дастгирии Ҳукумати Ҷумҳурии Тоҷикистон ва Вазорати фарҳанги Ҷумҳурии Тоҷикистон дирӯз дар Коллеҷи ҷумҳуриявии рассомии ба номи Мирзораҳмат Олимов ҷашнвораи ҷумҳуриявии «Рассомони наврас» баргузор гардид.
Ҳадаф аз баргузории ҷашнвора ташаккули ҳисси зебоипарастии наврасон, инчунин дастгирии мактаб, студия ва коллеҷҳои санъати тасвирӣ мебошад.
Дар ҷашнвора омӯзгорон ва рассомони навраси мактабҳои санъати тасвирӣ ва студияҳо расмҳои худро мавриди назари тамошобинон гардониданд.
Гуфта мешавад, ки ҳар як асари офаридаи кӯдакон тавассути забони олами гулҳои рангин, ҳисси аҷиби кӯдакона, нигоҳи ҷозибадори наврасон, муҳиту олами дилангези атроф бо мо дар гуфтугӯянд.
Бояд гуфт, ки дар ҷашнвораи мазкур ҳамчунин рассомони наврас аз шаҳру ноҳияҳои ҷумҳурӣ асарҳои рассомии худро ба тамошо гузоштанд, ки мавзӯъҳои гуногунро дар бар мегирифт ва бо тахайюлоти рангин рӯи коғаз омадаанд.
Маҳсули дасти хонандагон- беш аз 100 адад асари рассомӣ, кулолгарӣ, бофандагӣ, наққошӣ, кандакорӣ ва дигар офаридаҳои ҳунарӣ ба ҳозирин намоиш дода шуд. Дар анҷом ба рассомони ҷавон барои асарҳои рассомии беҳтарин туҳфа ва ифтихорномаҳо супорида шуданд. 
Дар ин бора аз Вазорати фарҳанги ҷумҳурӣ хабар доданд.