Роҳбари «Аш-Шабоб» ба ҳалокат расид
Душанбе,08.09.2014. (АМИТ «Ховар», Иброҳими Ҳабибуллоҳ).- Кишварҳои узви Иттиҳоди Аврупо 5-уми сентябр мувофиқат карданд, ки бинобар амалкардҳои Русия дар шарқи Украина, алайҳи Маскав таҳримҳои иловагӣ ҷорӣ шаванд. Вале агар созиши оташбас миёни ҷудоихоҳони тарафдори Русия ва неруҳои Украина риоят шавад ва Русия неруҳояшро аз Украина берун кунад, таҳримот ҳукми иҷро намегиранд.
Душанбе,08.09.2014. (АМИТ «Ховар»).-Президенти Ҷумҳурии Амрико Барак Обама ба васоити ахбори оммаи кишвараш гуфт, ки 10-уми сентябр стратегияи мубориза бо ҷангҷӯёни созмони Давлати Исломиро муаррифӣ мекунад. Ӯ зикр намуд, ки Амрико ва ҳампаймонҳояш ба неруҳои давлатии Ироқ ва неруҳои курд кумак мекунанд, то ба тадриҷ манотиқи ишғолкардаи Давлати Исломиро пас бигиранд ва дар ниҳоят ин созмонро ҳамроҳ аз байн бибаранд.
Душанбе,08.09.2014. (АМИТ «Ховар»).- Ҳафтаи гузашта дар саммити Созмони Аҳдномаи Атлантикаи Шимолӣ (НАТО), ки дар шаҳри Уэлси Британияи Кабир ҷараён дошт, дар мавриди афзоиш додани маблағгузорӣ ба соҳаи ҳифзи ҳуқуқ дар Афғонистон баъди соли 2014-ум сухан рафт. Дар ҳамоиши байналмилалӣ таъкид гардид, ки ба соҳаи мудофиа ва низомии Афғонистон то соли 2017-ум ҳаҷми маблағгузорӣ бояд аз 4,1 ба 5,1 миллиард доллари амрикоӣ афзоиш дода шавад.
Душанбе,08.09.2014. (АМИТ «Ховар»).- Аъзои ҳукумати Япония пурра ба истеъфо рафтанд. Истеъфои аъзои ҳукумат аз ҷониби Сарвазир Синзо Абэ қабул карда шуд. Ҳукумати кунунӣ пас аз ҷанги дуюми ҷаҳон тӯлонитарин дониста мешуд.
Душанбе,08.09.2014. (АМИТ «Ховар»).- Ҳукуматдорони Фаронса кӯшиш доранд, ки шумораи низомиёнашро дар шаҳри Кале зиёд намоянд, зеро вақтҳои охир шумораи муҳоҷироне, ки аз тариқи гулӯгоҳи Ла Манш кӯшиши ба Британияи Кабир ворид шуданро доранд, хеле зиёд гардидааст.
Душанбе,08.09.2014. (АМИТ «Ховар»).-6 сентябри соли равон роҳбари гурӯҳи ифротии «Аш-Шабоб» дар Сомали Аҳмад Абду Годан дар натиҷаи як амалиёти партоби мушаки ҳамопаймоҳои зарбазани ИМА ба ҳалокат расонида шуд.