Сарқонун-ҳуҷҷати стратегии Тоҷикистони соҳибистиқлол
Душанбе, 30.09.2014. (АМИТ “Ховар”, Мавҷуда Анварӣ).-Бахшида ба 20-умин солгарди қабули Конститутсия (Сарқонун)-иҶТ 2-юми октябри соли ҷорӣ дар Маркази тадқиқоти стратегии назди Президенти Ҷумҳурии Тоҷикистон дар мавзӯи «Сарқонун-ҳуҷҷати стратегии Тоҷикистони соҳибистиқлол» мизи гирд баргузор мегардад.
Тибқи иттилои Маркази тадқиқоти стратегӣ дар мизи гирд олимон, муҳаққиқон, мутахассисон аз идораву ташкилотҳо, институтҳои илмӣ-тадқиқотӣ ва донишкадаҳои олии кишвар ширкат варзида, масъалаҳои «Конститутсия ҳамчун кафили рушди ҷомеаи шаҳрвандӣ», «Конститутсия ва принсипи тақсими ҳокимият дар шароити Тоҷикистони муосир», «Конститутсияи Ҷумҳурии Тоҷикистон ҳамчун асоси фаъолияти ҳокимияти судӣ», «Конститутсия ва воқеияти он дар ҳифзи асосҳои бунёдии ҳуқуқ ва озодиҳои шаҳрвандӣ», «Конститутсияи Ҷумҳурии Тоҷикистон ва меъёрҳои ҳуқуқи байналмилалӣ», «Сохтори конститутсионӣ дар Тоҷикистони соҳибистиқлол», «Конститутсия: назария ва амалияи тадбиқи он», «Нақши Конститутсия дар таъмини рушди низоми қонунгузорӣ дар Тоҷикистон», «Принсипи дунявият: мафҳум ва моҳияти он» ва «Тоҷикистон ҳамчун давлати демократӣ» мавриди баррасӣ ва омӯзиш қарор хоҳанд гирифт.