Таҷлили «Рӯзи китоб» дар КМТ

Душанбе, 2.09.2014. (АМИТ «Ховар»,  Раъно Нусратуллозода).-Имрӯз дар Китобхонаи миллии Тоҷикистон (КМТ) бахшида ба “Рӯзи китоб” маҷлиси танатанавӣ доир гардид. Дар ҷамъомад директори китобхона Носирҷон Салимов, вазири фарҳанги Ҷумҳурии Тоҷикистон Шамсиддин Орумбекзода иштирок намуданд.
Ш. Орумбекзода аҳли нишастро бо иди китоб табрик гуфта, ба чанд нафар аз кормандони китобхона, аз ҷумла ба Фотима Яқубова нишони “Аълочии фарҳанги Ҷумҳурии Тоҷикистон» ва ба нуҳ нафар корманди китобхона Ифтихорномаи Вазорати фарҳанг супорида шуд.
Бахшида ба ин рӯз ба кормандони  бехтарини китобхона барои фаъолияти пурсамари меҳнатиашон Ифтихорномаи Китобхонаи миллии Тоҷикистон супорида шуд. Сипас, меҳмонон Аскар Ҳаким, Саттор Турсун перомуни китобу китобдорӣ ҳарф зада, ҳамагонро бо ин рӯзи фараҳбахш табрик намуданд.
Ёдовар мешавем ки 4 — уми сентябр ҳамчун рӯзи китоб ҳамасола дар саросари ҷумҳурӣ таҷлил мешавад. Имсол низ бахшида ба ин рӯз дар Китобхонаи миллӣ ҳафтаи китоб эълон шудааст, ки ҳамарӯза чорабиниҳои фарҳангию маърифатӣ гузаронида шуда, санаи 7 -уми сентябр ҷамъбаст мешаванд.