Вохӯрии Р. Раҳимзода бо шунавандагони Академияи ВКД

Душанбе, 02.09.2014. (АМИТ «Ховар», Мукаддас Темурзода), — Дирӯз вазири корҳои дохилии ҶТ Рамазон Раҳимзода зимни боздид аз Академияи Вазорати корҳои дохилӣ омӯзгорону шунавандагонро бо оғози соли нави таҳсил ва ҳамзамон бо фарорасии ҷашни Истиқлолияти давлатии Ҷумҳурии Тоҷикистон самимона табрик намуда, аз ҷумла зикр намуд, ки ҷомеаро дар тамоми давру замон, новобаста аз чигунагии шароит, бе иштирок ва мавқеи намояндагони илму маърифат, олимон ва аҳли адаб тасаввур намудан ғайриимкон аст.
Вазири корҳои дохилӣ ба саволҳои шунавандагон ҷавобҳои мушаххас дода, гуфт, ки барои онҳо тамоми шароитҳои таълимӣ ва имкониятҳои васеъ муҳайё гардидааст, то бо андӯхтани илму дониш ба давлату миллат содиқона хизмат намуда, дар пешрафти ҳаёти сиёсӣ-иқтисодӣ ва илмӣ-фарҳангӣ саҳми арзанда гузоранд.
Ёдовар мешавем, ки Мактаби олии ВКД Ҷумҳурии Тоҷикистон соли 1991 таъсис дода шуда, 30-юми декабри соли 2000 ба Академияи ВКД Ҷумҳурии Тоҷикистон табдил шудааст.
Маврид ба зикр аст, ки ҳамасола ба ҳисоби миёна 550-650 нафар Академияро ба таври рӯзона ва ғоибона хатм намуда, 35-450 нафар корманд аз курсҳои такмили ихтисос мегузарад. Дар зарфи 23-сол Академияро зиёда аз 8000 нафар ба шакли таҳсили рӯзона ва беш аз 5000 нафар таҳсили ғоибона хатм намудааст.
Таълим дар Академия бо забонҳои тоҷикию русӣ сурат мегирад. Дар Академия панҷ факулта фаъолият намуда, 166 фан таълим дода мешавад. 
Академияи Вазорати корҳои дохилӣ бо муассисаҳои олии таълимии ҷумҳуриҳои Русия, Украина, Беларус, Қирғизистон, Қазоқистон, Латвия, Туркия ва дигар кишварҳо робитаи зич дорад. Аз ҷониби устодони Академия дар ин давра беш аз садҳо китобу монографияҳо, 1500 мақолаҳои илмӣ-тадқиқотӣ таълиф шудаанд.
Имсол низ омӯзгорону шунавандагони ин боргоҳи таълим бо як омодагии хуб ба таҳсилу тадрис шурӯъ намуда, аз имкониятҳои мавҷуда самаранок истифода хоҳанд бурд.