Ёрии коршиноси САҲА ба рушди МОИ «Суғд»

Душанбе, 01.09.2014. (АМИТ «Ховар», Лайло  Тоирӣ). – Чанде  пеш   коршиноси  САҲА Горан  Сумкоски аз  маъмурияти  Минтақаи  озоди  иқтисодии  «Суғд»  боздид намуд. Номбурда барои  дастгирии  чор  минтақаи  озоди  иқтисодии  Тоҷикистон  ду  моҳ  боз  санҷиш  мегузаронад.  Мақсад  аз  ин  чорабинӣ  додани тавсияҳо  барои арзёбии вазъи  минтақаҳои  озоди  иқтисодӣ ва  расонидани  кумаки  зарурӣ барои рушди  онҳост.
Тавре  ки  аз  маркази  матбуоти  МОИ «Суғд»  хабар  доданд, зимни суҳбат  дар маъмурияти МОИ «Суғд»  самтҳои  афзалиятноки татбиқи лоиҳаҳои   расонидани  ёрӣ ба  манзури  тарҳрезии   стратегияи рушд, ҷалби коршиносони  ихтиёрӣ барои  додани маслиҳат дар бахшҳои  мухталифи  фаъолият  ва  ҷалби  сармояҳои  хориҷӣ  мавриди  муҳокима  қарор  гирифтанд. 
Горан  Сумкоски  иқдомоти кормандони маъмуриятро  ҷиҳати  таҷдиду  беҳдошти  сифати  иттилоот  дар  бораи  имкониятҳои  МОИ «Суғд» ба таври  умум  маъқул  ёфта ва  дастгирӣ кард.
Мавсуф  аз рӯи  натиҷаи  санҷиши  зикршуда  иброз  дошт, ки барои  расидан  ба  мақсадҳои  рушди  босуръати Минтақаи  озоди  иқтисодии  «Суғд» ҳамаҷониба  мусоидат  хоҳад  кард.