10-умин намоишгоҳи байналхалқӣ дар Бишкек

 
Душанбе, 13.10.2014. (АМИТ “Ховар”, Ситораи Боймурод).- Дар шаҳри Бишкеки Ҷумҳурии Қирғизистон 10-умин намоиши байналхалкии «Агропродэкспо-2014» доир гардид. Дар намоишгоҳ зиёда аз 50 ширкат аз давлатҳои Аврупо Федератсияи Русия, Ҷумҳурии Қазоқистон, Ҳиндустон, Эрон, Олмон, Голландия, Тоҷикистон ва Қирғизистон иштирок намуд.
Тавре ки дар ин бора хадамоти матбуоти раиси вилояти Суғд хабар додааст, бо дастгирии молиявии Барномаи Рушди Созмони Милали Муттаҳид дар Ҷумҳурии Тоҷикистон ва дар ҳамкорӣ бо Палатаи савдо ва саноати Ҷумҳурии Тоҷикистон дар чорабинӣ намояндагони панҷ корхонаи истеҳсолкунандаи маҳсулоти хӯрокӣ- ҶДММ «Зода»- истеҳсолгари нӯшокиҳои табиии хуч ва зардолуоб, ҶДММ «Кулканд»- шарбатҳои мевагӣ ва консерва, ҶДММ «Исфарафуд»- меваи хушк, ТҶМ Ассотсиатсияи занбӯрпарварони «Суғд»бо намудҳои гуногуни асал ва ҶДММ «Комбинати хӯроквории Қурғонтеппа»- маҳсулоти консервагӣ бо пешниҳоди молу маҳсулоташон ширкат варзиданд.
Гуфта мешавад, ки дар маросими кушодашавии намоишгоҳи байналхалқӣ сафири  Ҷумҳурии Тоҷикистон дар Ҷумҳурии Қирғизистон Олим Раҳимов, раиси Палатаи савдо ва саноати Ҷумҳурии Қирғизистон Марат Шаркешеев, муовини вазири кишоварзии Ҷумҳурии Қирғизистон Ҷ. Керималиев,   намояндагони ташкилотҳои байналхалқӣ ва намояндагони ВАО ширкат намуданд.
Мақсади баргузории чорабинӣ- рушди содироти маҳсулот ба давлатҳои хориҷӣ, рушди соҳаи агросаноатӣ, аз ҷумла соҳибкории хурду миёна ба ҳисоб меравад.