Баррасии авзои сиёсиву адабии асри Ҷомӣ

Душанбе, 3.10.2014. (АМИТ “Ховар”, Мавҷуда Анварӣ).- Аз 3 то 4 ноябри соли равон бахшида ба 600-умин солгарди мавлуди шоири ориф Мавлоно Абдураҳмони Ҷомӣ дар шаҳри Хуҷанд конфронси байналхалқӣ баргузор мегардад.
 
Ҳадаф аз гузаронидани ин ҳамоиш пеш аз ҳама мусоидати ҳарчи бештар дар пажӯҳиши рӯзгору осори шоир, афкор ва андешаҳои адабиву ирфонӣ, фалсафиву ахлоқӣ, баррасии авзои сиёсиву иҷтимоӣ, фарҳангиву илмӣ ва адабии асри Ҷомӣ, ҷараёнҳои фикриву адабӣ дар ин аҳд, нусхашиносӣ, тарҷума ва нашри осори адиб ва амсоли ин буда, он бо  ҷалби муҳаққиқони ватаниву хориҷӣ доир мешавад.
 
Тибқи иттилои Хадамоти матбуоти раиси вилояти Суғд дар меҳвари асосии конфронс баррасии авзои сиёсиву иҷтимоӣ ва таърихии асри Ҷомӣ, таҳаввули илму адабиёт ва фарҳанг дар замони зиндагии шоир, шеъру адаб ва ҳавзаҳои адабӣ дар асри Ҷомӣ, густариши ҳунарҳои миллӣ, мусиқӣ ва анвои санъат, афкори сиёсӣ, иҷтимоӣ, фалсафӣ ва ахлоқии Абдураҳмони Ҷомӣ, нусхашиносӣ, тарҷума ва нашри  осори шоир, муаррифии нусхаҳои хаттии осори Ҷомӣ дар китобхонаҳои ҷаҳон, афкори ирфонии шоир ва таҷассуми он дар осори манзум ва мансури ӯ ва масоили дигар қарор мегиранд.