Э. Раҳмон: “Забон-баёнгари сарнавишти таърихии халқи тоҷик”

Душанбе, 4.10.2014. (АМИТ “Ховар”).-Ба ҳамагон маълум аст, ки забон баёнгари сарнавишти таърихии халқи тоҷик буда, бо истиқлоли ватани мо пайванди ҷовидонӣ пайдо кардааст. Ин нуктаро 4 октябр зимни таҷлили Рӯзи забони давлатӣ ва ҷашни 600-солагии Мавлоно Абдураҳмони Ҷомӣ Президенти кишвар Эмомалӣ Раҳмон баён дошт. 
Сарвари Давлат афзуд, ки дар тўли тамоми таърих забон барои миллати мо яке аз арсаҳои муборизаи истиқлолхоҳӣ ва ватанпарастӣ ба шумор мерафт. Хусусан имрўз дар раванди ҷаҳонишавӣ мо бояд забону фарҳанги худро ҳамчун неъмати бузург эҳтиёт карда, онро аз таъсиру таҳдидҳои замона эмин дорем. 
“Миллати тоҷик нек медонад, ки кулли ганҷинаи адабу фарҳанги мо тавассути забон ҷовидон мондааст ва ба воситаи забон дар арсаи ҷаҳон эътироф ва шинохта шудааст.Мо бояд забони давлатиамонро мисли оинаи поку пурҷило нигоҳ дорем ва онро аз ҳар гуна олоишу омехтагиҳои нозаруру ғайриматлуб ҳифз намоем”, — таъкид намуд Э. Раҳмон.