Кӯчиши 300 хоҷагӣ аз минтақаҳои хавфноки экологӣ

Душанбе, 21.10.2014. (АМИТ «Ховар», Лайло Тоирӣ)-Барои  546 оилаи муҳоҷирони экологӣ  дар нӯҳ моҳи соли равон  барои сохтмони  манзили  истиқоматӣ қитъаи замин ҷудо гардид, ки ин 85%-и нақшаи солонаро ташкил медиҳад.  
Дар нӯҳ моҳи соли 2014 дар самти муҳоҷирати  экологӣ  ҷиҳати татбиқи қарорҳои Ҳукумати Ҷумҳурии Тоҷикистон дар давоми солҳои 2014-2016 рӯйхати 300 хоҷагӣ барои кӯчонидан аз минтақаҳои хавфноки экологӣ ба мавзеъҳои бехавф дар соли 2014 тасдиқ  гардид, ки  38 хоҷагӣ аз ВМКБ, 50 хоҷагӣ аз вилояти Суғд, 128 хоҷагӣ аз вилояти Хатлон   ва 84 хоҷагӣ аз навоҳии тобеи ҷумҳурӣ мебошанд. 
Бино ба гуфтаи сардори  Раёсати муносибатҳои байналхалқӣ ва робита бо ҷомеаи Вазорати меҳнат, муҳоҷират ва шуғли аҳолӣ Усмоналӣ Латифӣ дар айни замон 196 хоҷагӣ аз минтақаҳои хавфноки ҷумҳурӣ ба мавзеъҳои бехавф кӯчонида шуд, ки ин 64% нақшаи кориро ташкил дода, боқимонда 104 хоҷагӣ мутобиқи нақшаи соли ҷорӣ аз ҷониби мақомоти иҷроияи ҳокимияти давлатии ВМКБ, вилоятҳо ва ноҳияҳои тобеи ҷумҳурӣ бо қитъаи замини наздиҳавлигӣ таъмин гардида, дар ин самт корҳои сохтмонӣ идома доранд.