Камераҳои мушоҳидавӣ- танзимгари тартиботи ҷамъиятӣ
Душанбе, 10.10.2014. (АМИТ “Ховар”, Мавҷуда Анварӣ).- Вазъи ҷаҳони муосир ва рӯйдоду воқеаҳои ҷиноятӣ тақозо мекунад, ки кор дар самти пешгирию ошкор кардани кирдорҳои ҷиноӣ ва таъмини ҳифзи тартиботи ҷамъиятӣ пурзӯр карда шавад.
«Шароити хизмату фаъолият ва таъминоти таҷҳизоти замонавӣ дар Вазорати корҳои дохилӣ имрӯз пурра ба талабот ҷавобгӯ аст. Баҳри бехатарӣ ва таъмини ҳифзи тартиботи ҷамъиятӣ ва амнияти шаҳрвандон кормандони мақомоти корҳои дохилӣ аз роҳу усул ва техникаҳои пешқадами замонавӣ истифода мебаранд»,- мегӯяд корманди вазорати мазкур Нусратулло Саидов.
Новобаста аз сафарбар гардидани шумораи зиёди кормандони милитсия барои хизмат дар кӯчаву хиёбон, боғу гулгашт ва маҳаллаҳои пойтахт, илова бар ин, дар тамоми ҳудуди шаҳри Душанбе дастгоҳҳои мушоҳидавии наворбардорӣ насб гардидааст. Аз ҷумла, боғҳои фарҳангию истироҳатӣ, майдонҳо, бахусус ҷойҳои серодами шаҳр, маркази савдою бозор, истгоҳҳову фурудгоҳ ва масҷиду ҷойҳои фарҳангӣ бо камераҳои мушоҳидавӣ пурра таъминанд.
Ба андешаи Нусратулло Саидов мақсади васл намудани камераҳои мушоҳидавӣ дар иншооту марказ ва ҷойҳои ҷамъиятӣ- ин таҳти назорати пурраи фаврӣ қарор додани шаҳри Душанбе мебошад. Ба таври фаврӣ муайяну ошкор кардани амалҳои содиршаванда ва ё дар нақша доштаи шахсони ҷиноятпеша тавассути дастгоҳҳои наворбардорӣ ба амнияти ҷомеа ва шаҳрвандон мусоидат мекунад.
Бахусус, дар бозору марказҳои савдо будани чунин дастгоҳҳои мушоҳидавӣ сари вақт ба ошкоршавии ҷиноятҳои дуздӣ кумак мерасонад. Чуноне зикр шуд, насби камераҳои мушоҳидавӣ метавонад содиршавии ҳар гуна амалу кирдорҳои номатлубро дар ҷомеа пешгирӣ намояд.
Имрӯзҳо, ки афроди бадхоҳу ихтилофҷӯ мехоҳанд бо амалҳои ифротгароёнаи худ дар ҷомеа таблиғоту ташвиқоти ботилро дар шакли варақаҳои тарғиботӣ амалӣ созанд, боварӣ аст, ки фаъолияти ин дастгоҳҳои мушоҳидавӣ ба амалишавии мақсадҳои нопоки ин гуна афрод халали ҷиддӣ расонида, онҳоро ноком месозад. Имрӯзҳо дар қатори дигар иншооти муҳими фарҳангию маъмурӣ тамоми атроф ва дохили масҷидҳои панҷвақта ва ҷомеи шаҳри Душанбе бо таҷҳизоти наворбардорӣ таъмин шудааст. Хуб мешуд шаҳрвандон низ атроф ва даромадгоҳҳои биноҳои истиқоматии хешро бо чунин дастгоҳҳои наворбардорӣ таъмин мекарданд, то ҳар гуна нияту амале, ки аз ҷониби шахсони бадсиришт эҳтимоли ба вуқӯъ омаданро дорад, сари вақт пешгирӣ мешуд.