Машваратҳои иттилоотӣ дар Чкалову Қайроққум

Душанбе, 16.10.2014. (АМИТ «Ховар», Зарангези Латиф).- Дирӯз дар шаҳрҳои саноатии Қайроққум ва Чкалов машваратҳои иттилоотӣ доир шуданд. 
Машварати иттилоотӣ дар Кумитаи ҳифзи муҳити зисти шаҳри Қайроққум бо иштироки намояндагони мақомоти иҷроияи ҳокимияти давлатӣ, раисони ҷамоати шаҳракҳои Консой, Адрасмон, Зарнисор, Чоруқдаррон, Сирдарё ва Навгарзан, раисони кумитаҳои маҳалла, кормандони соҳаҳои мухталиф ва муҳоҷирони меҳнатӣ, ки 110 нафар буданд, дар шакли мизи мудаввар гузашт.
Иштирокчиён зимни суҳбати озод ва саволу ҷавоб аз таъсиси шуъбаю бахшҳои Хадамоти муҳоҷират изҳори хурсандӣ карда, пешниҳод намуданд, ки субъектҳои хоҷагидор дар минтақаҳо ҳам фаъолияташонро ба роҳ монанд.
Гуфта мешавад, ки дар машварати иттилоотӣ дар маҷлисгоҳи мақомоти иҷроияи ҳокимияти давлатии шаҳри Чкалов навгониҳои қонунгузории Федератсияи Русия вобаста ба муҳоҷират ва қоидаҳои муҳоҷирати бехатар ба иштирокчиён фаҳмонида шуданд. Аҳли толор аз он изҳори хурсандӣ намуданд, ки эътибори давлату ҳукумат ба муҳоҷирони меҳнатӣ рӯз то рӯз беҳтар мешавад.