Муҳокимаи ислоҳоти муҳим дар самти таҳсилоти олӣ

Душанбе, 28.10.2014. (АМИТ «Ховар», Зарангези Латиф).- Имрӯз дар шаҳри Душанбе конфронс дар мавзӯи «Анҷоми Лоиҳаи гранти Барномаи ҳамкории рушди таҳсилоти Русия (READ) — марҳалаи II дар Ҷумҳурии Тоҷикистон ва натиҷаҳои асосии соли аввали имтиҳонҳои марказонидаи дохилшавӣ» баргузор гардид.
Патрисия Виверз — Картер, намояндаи доимии Бонки ҷаҳонӣ дар Тоҷикистон зикр намуд, ки: «Бонки ҷаҳонӣ ва Тоҷикистон дар соҳаи маориф шарикони дерина мебошанд, зеро такмилдиҳии маълумот барои паст кардани сатҳи камбизоатӣ ва баланд бардоштани сатҳи рақобатпазирии иқтисодӣ нақши муҳимро мебозад». Ҳамчунин илова намуд, ки:  «Маркази миллии тестӣ ва имтиҳонҳои марказонидашуда ба стандартикунонии таҷриба ва тартиби тестгузаронӣ, коҳиш додани коррупсия ва ба донишҷӯён фароҳам овардани дастрасии баробар ба таҳсилоти олӣ равона шудаанд».
Гуфта шуд, ки пас аз марҳилаи таҳия, арзёбӣ ва санҷидани он дар солҳои 2012 ва 2013, ММТ раванди ММД-ро моҳи декабри соли 2013 ва моҳи майи соли роҳандозӣ намуд. ММТ аз ҷумла тақсимоти ҷойҳоро дар донишгоҳҳо бори аввал дар саросари ҷумҳурӣ гузаронид. 
Зиёда аз 52 ҳазор 500 нафар довталаб аз ҷониби тамоми муассисаҳои таҳсилоти олии кишвар барои имтиҳонсупорӣ (аз ҷумла 17500 нафар духтар), ки аз соли гузашта 30 фоиз зиёдтар аст, ба қайд гирифта шуд. Тақрибан 46000 нафар довталаби дигар ба қайд гирифта шуда, барои иштирок дар озмун соҳиби холи ҳадди ақал гардиданд.