Муҳокимаи масоили муҳоҷирати ғайриқонунӣ

Душанбе, 02.10.2014. (АМИТ «Ховар», Фарзона  Достонзода). — 1  октябр  дар  шаҳри  Душанбе ҷаласаи Шӯрои ҳамгироии  роҳбарони мақомоти  салоҳиятдори  давлатҳои  узви СААД аз рӯи  масоили  мубориза бо  муҳоҷирати  ғайриқонунӣ  баргузор  гардид.
Тавре  ки   аз  СААД  ба  АМИТ «Ховар»  хабар  доданд,  дар  ҷаласа  роҳбарони  мақомоти  салоҳиядори давлатҳои  узви  СААД  оид ба   масоили  мубориза бо  муҳоҷирати  ғайриқонунӣ,  ҳамчунин  намояндагони Хадамоти  танзимотии Шӯрои  фармондеҳони қӯшунҳои  сарҳадии  ИДМ  ширкат  доштанд.
Дар  ҷараёни  ҷаласа ҳамчунин  масоили муносибати  нав  ба  ташкили  кор   барои  муқовимат  ба  муҳоҷирати  ғайриқонунӣ  ва  танзими он  тибқи  қонуну  меъёрҳои ҳуқуқӣ  мавриди  муҳокима  қарор  гирифтанд.
Зикр  шуд, ки Шӯрои ҳамгироӣ  усулҳои  амалии  ташкили  ин  корро  тарҳрезӣ  намуд, ки он  ба  тайи  7 соли охир  муваффақона  роҳандозӣ  шудани  чорабиниҳои фаврии ҷилавгирӣ ва  амалиёти  махсус  барои  муқовимат  ба  муҳоҷирати  ғайриқонунӣ,  аз ҷумла  одамрабоӣ таҳти  унвони  шартии «Нелегал»  мусоидат  намуд.