Мулоқоти хоссаи А. Қаҳҳоров бо Н. Патрушев

 
Душанбе, 17.10.2014 (АМИТ «Ховар», Фарзонаи Давлат).-Дирўз Котиби Шўрои амнияти Федератсияи Русия Николай Патрушев бо сафари корӣ ба Душанбе омад. Бегоҳии  рўз дар бўстонсарои  шаҳрии Ҳукумати  мамлакат   мулоқоти  хоссаи Котиби Шўрои амнияти Ҷумҳурии Тоҷикистон  Абдураҳим Қаҳҳоров  бо Котиби Шўрои амнияти Федератсияи Русия Николай Патрушев доир шуд.  Вохўрии навбатии котибони Шўрои амнияти ду давлат идомаи музокироти қаблии ҳайатҳои Тоҷикистону Русия оид ба масоили амният  ба ҳисоб меравад, ки моҳи октябри соли гузашта дар шаҳри Маскав доир гардид. Дар ин мулоқот ва мулоқоти қаблӣ масоили таҳкими ҳамкорӣ дар соҳаи амнияти мудофиавӣ, ҷамъиятӣ, иқтисодӣ ва иттилоотӣ мавриди баррасӣ қарор гирифт. Дар доираи вохўрии навбатӣ дар шаҳри Душанбе котибони Шўрои амният ва коршиносони дастгоҳи марказии Шўрои амнияти ду давлат ҳамчунин доир ба  масоили ҳамкориҳои дуҷонибаи Ҷумҳурии Тоҷикистон  ва Федератсияи Русия вобаста ба татбиқи пешниҳодҳои ҳайатҳо ва таклифҳои нави ҳамкорӣ дар соҳаи амният, масоили амнияти байналмилалӣ, аз ҷумла вазъи  Афғонистон ва масъалаҳои вобаста ба  ҳамкориҳои ҳарбӣ-техникӣ   мубодилаи афкор карданд.