Мулоқоти С. Тағойзода бо роҳбарони ҷамъиятҳои тоҷикон

Душанбе, 17.10.2014. (АМИТ «Ховар», Лайло Тоирӣ)-Вазири меҳнат, муҳоҷират ва шуғли аҳолии Ҷумҳурии Тоҷикистон Сумангул Тағойзода 16 октябри соли 2014 бо роҳбарони ҷамъиятҳои тоҷикони муқими Федератсияи Русия мулоқот намуд.
Дар ҷараёни мулоқот роҳбарони як силсила сохторҳои таркибии вазорат иштирок намуда, масъалаҳои муҳоҷирати меҳнатӣ ва паҳлӯҳои гуногуни онро баррасӣ намуданд. 
Тавре ки зикр гардид, имрӯзҳо яке аз сабабҳои асосии мушкилоти муҳоҷирони меҳнатии тоҷик — надонистани забони русӣ, таъриху фарҳанг ва қонунгузории Федератсияи Русия дар самти муҳоҷират мебошад.
 Ёдовар мешавем, ки дар низоми  Вазорати меҳнат, муҳоҷират ва шуғли аҳолии ҶТ Муассисаи давлатии «Маркази таълими калонсолони Тоҷикистон» фаъолият дорад, ки хоҳишмандон метавонанд дар курсҳои кӯтоҳмуддат таҳсил намуда, соҳиби шаҳодатномаи касбӣ гарданд. 
Инчунин аз аввали моҳи сентябри соли ҷорӣ аз ҳисоби кормандони  тамоми низоми вазорат бо мақсади бурдани корҳои тарғиботию ташвиқотӣ дар байни аҳолӣ гурӯҳҳои корӣ ташкил шуданд, ки қарор аст кори ин гурӯҳҳо то  20 октябри соли ҷорӣ идома ёбанд. 
Бино ба иттилои Раёсати муносибатҳои  байналҳалқӣ ва  робита бо ҷомеаи вазорат, дар фарҷоми мулоқот роҳбарони ҷамъиятҳо барои боз ҳам беҳтар намудани шароити зисту зиндагонии муҳоҷирон ва ҳимояи ҳуқуқу манфиятҳои онҳо дар қаламрави Федератсияи Русия таклифу пешниҳодҳояшонро ироа намуданд.