Шиносоии Қ.Расулзода бо корҳои омодагӣ ба ҷашни 3000-солагии Ҳисор

Душанбе, 17.10.2014 (АМИТ «Ховар», Фарзонаи Давлат).-Имрўз Сарвазири мамлакат Қоҳир Расулзода дар ноҳияи Ҳисор бо ҷараёни  корҳои омодагӣ ба таҷлили  ҷашни 3000-солагии Ҳисор шинос шуд.
  Ҳайати кумитаи тадорукоти  ҷашни 3000-солагии Ҳисор дар ноҳия нахуст аз  маҳали  сохтмони маҷмӯи биноҳои истиқоматии баландошёна дидан кард. Сарвазири мамлакат ба масъулони ширкатҳои сохтмонию маблағгузорон  барои бартарафсозии камбудиҳо  ва вусъати корҳои сохтмонию беҳтар намудани сифати корҳо ба  муддати як моҳ муҳлат дод.
Сипас ҳайати корӣ бо сохтмони роҳи марказии ноҳия дар пайванди шоҳроҳи асосии мошингарди Душанбе -Турсунзода, варзишгоҳ барои 20 ҳазор ҷойи нишаст, гимназияи президентӣ барои 640 хонанда, чойхона, осорхона, китобхона ва Қасри фарҳанги ноҳия шинос шуд. Тавре ки таъкид гардид, дар маҷмӯъ суръати корҳои сохтмонӣ дар аксари ин  иншооти асосии ҷашнӣ мувофиқи матлаб ба роҳ монда нашудааст. Аъзои кумитаи тадорукот баъдан аз маҳали сохтмони беморхона барои 205 кат, зеристгоҳҳои барқи Ҳисор ва Шаҳринав дидан карда, бо ҷараёни  таъмиру барқарорсозии шабакаҳои обу корезии ноҳия ва таъмиру таҷдиди Қалъаи Ҳисор шинос шуданд.
Ҷараёни шиносоии ҳайати корӣ бо ҷараёни омодагиҳо дар маҷлиси сайёри кумитаи тадорукоти ҷашни 3000-солагии Ҳисор таҳти раёсати Сарвазири мамлакат Қоҳир  Расулзода натиҷагирӣ шуд. Дар маҷлиси сайёри кумитаи тадорукот Сарвазири мамлакат таъкид бар он дошт, ки дар партави тавваҷуҳи доимии Президенти Ҷумҳурии Тоҷикистон барои дар сатҳи зарурӣ ва сазовор истиқбол намудани ҷашни  3000- солагии Ҳисор бояд вусъати корҳои омодагӣ ва таъмини иҷрои дастуру супоришҳои Сарвари Давлат дар сатҳи баланд таъмин шаванд. Аъзои кумитаи тадорукот, роҳбарияти ноҳия ва ташкилоту идораҳои ҷумҳуриявию ноҳиявӣ ҳамзамон  вазифадор шуданд, ки ҳамаҷониба ба раванди пешбурди корҳои омодагӣ, ободонӣ ва хуррамгардонии ноҳияи Ҳисор мусоидат намоянд.