Тавҳидӣ: «Қонуни асосии Тоҷикистон воқеан аз ғояҳои башардӯстона иборат аст»

Душанбе, 15.10.2014. (АМИТ «Ховар»). — Ба ифтихори 20-умин солгарди Конститутсия (Сарқонун)-и Ҷумҳурии Тоҷикистон Пажӯҳишгоҳи фарҳанги форсӣ — тоҷикии сафорати Ҷумҳурии Исломии Эрон дар Тоҷикистон матни Сарқонуни Ҷумҳурии Тоҷикистонро бо ҳуруфи форсӣ зери унвони «Қонуни асосии Ҷумҳурии Тоҷикистон» ба табъ расонид. Муҳаққиқ ва баргардонандаи матн шаҳрванди Ҷумҳурии Исломии Эрон Алӣ Тавҳидии Ҷонбоз —  фориғуттаҳсили бахши ҳуқуқи Донишгоҳи Теҳрон ва дар айни замон донишҷўи соли охири ҳуқуқи байналмилалии умумии Донишгоҳи миллии Тоҷикистон мебошад.
Зикр кардан ба маврид аст, ки оқои Алӣ Тавҳидӣ ба маъюбии худ нигоҳ накарда, бо эҳтироме, ки нисбат ба Сарқонуни Ҷумҳурии Тоҷикистон доштааст, хеле орифона ва нуктасанҷона  ин матни муқаддасоти Тоҷикистонро таҳқиқ ва баргардон намудааст.
«Қонуни асосии Ҷумҳурии Тоҷикистон воқеан аз ғояҳои башардӯстона иборат буда, он инъикоскунандаи суннатҳои ғании халқи тоҷик маҳсуб мешавад, ки аз барҷастатарин намунаҳои фарҳанги ниёгон ва мероси бузургони таъриху адабиёт, ки аз ҷониби ҷомеаи ҷаҳонӣ эътироф гардидааст, сарчашма мегирад ва бемуҳобот он ҳамчун яке аз конститутсияҳои демократитарин  дар байни кишварҳо маҳсуб меёбад», — гуфт зимни суҳбат Алӣ Тавҳидӣ.