Ҳафтаи ҷаҳонии соҳибкорӣ дар Тоҷикистон

Душанбе,  14.11.2014. (АМИТ «Ховар»,  Покизаи  Шодмон).-  Дар  ҳошияи   лоиҳаи  байналмилалӣ, ки  аксарияти  кишварҳоро  фаро  мегирад,  аз  17  то  21  ноябр  Ҳафтаи  ҷаҳонии  соҳибкорӣ  дар  Тоҷикистон  баргузор  мешавад. Мақсад  аз  ин  чорабинӣ баланд  бардоштани  сатҳи  фарҳанги  соҳибкорӣ  ва   рушди  он  дар  байни  ҷавонон  аст. 
Тавре  ки  аз Ассосиатсияи   соҳибкории хурду  миёнаи  Тоҷикистон ба АМИТ «Ховар»  хабар  доданд,  лоиҳаи  мазкур  бори  нахуст  соли  2006 дар Британияи  Кабир  дар  амал  татбиқ  шуда,  баъдан  хусусияти   байналмилалӣ   пайдо  карда,  ҳар  сол  дар  саросари  ҷаҳон  роҳандозӣ  мешавад. Имсол  Ҳафтаи   ҷаҳонии  соҳибкорӣ  дар  153  кишвар  рӯи  кор омада,   соҳибкорони тамоми  ҷаҳонро муттаҳид  месозад. 
Палатаи  савдои  Амрико  дар  Тоҷикистон  дар  шахсияти  ташкилкунандаи  асосии  ин  чорабинӣ  Даниел  Заретский ҷониби  қабулкунандаи Ҳафтаи  ҷаҳонии  соҳибкорӣ  дар  Тоҷикистон  ба  шумор  меравад. 
Имсол  дар  ҳошияи Ҳафтаи  ҷаҳонии  соҳибкорӣ  ибтикороти нав — Рӯзи  байналмилалии   соҳибкории   занон  роҳандозӣ  мешавад, ки  мақсад  аз он  дастгирӣ  ва тарғиби  соҳибкорӣ дар  байни  занон аст.