Ҳифзи ҳуқуқу манофеи қонунии шаҳрвандони хориҷӣ
Душанбе, 21.11.2014. (АМИТ «Ховар», Лайло Тоирӣ ).- Чанде пеш сардори шуъбаи кор бо муҳоҷирони меҳнатии Хадамоти муҳоҷирати ҶТ дар ФР Мансур Орифов дар шаҳри Маскав дар кори мизи мудаввар дар мавзӯи «Таҷрибаи беҳтарини фаъолияти созмонҳои ҷамъиятию ғайридавлатӣ барои ҳифзи ҳуқуқу манофеи қонунии шаҳрвандони хориҷӣ» иштирок намуд.
Ин чорабиниро Палатаи ҷамъиятӣ оид ба рушди дипломатияи ҷамъиятӣ ва дастгирии ҳамватанони хориҷӣ бо ибтикори Дафтари созмони байналмилалии муҳоҷират дар шаҳри Маскав роҳандозӣ намуд.
Мувофиқи суханони котиби матбуоти намояндагии Хадамоти муҳоҷирати ҶТ дар ФР Иброҳим Аҳмадов, Мансур Орифов зикр намуд, ки намояндагӣ бо Дафтари созмони байналмилалии муҳоҷират дар шаҳри Маскав ҳамкорӣ дошта, дар он барои ҳифзи ҳуқуқу манофеи шаҳрвандони хориҷӣ ҳимоягар таъйин шудааст. Мавсуф ҳамчунин гуфт, ки дар ин самт бо созмони ҳифзи ҳуқуқи Маркази ҳамгироии «Муҳоҷират ва қонун» кори судманд анҷом дода мешавад.